الماتى قالاسى ءبىلىم باسقارماسىنا قاراستى قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعىنىڭ ۇيىمداستىرۋىمەن «سالاۋاتتى ۇرپاق تاربيەلەيمىز!» تاقىرىبىندا حالىقارالىق كونفەرەنسيا ءوتتى.
ءىس-شاراعا شەتەلدىك جانە «سالاۋاتتى تاماقتانۋ مەكتەبى» باعدارلاماسىن جۇزەگە اسىرۋعا بەلسەندى اتسالىپ جۇرگەن الماتى مەن استانا قالالارىنىڭ ءبىلىم بەرۋ سالاسى قىزمەتكەرلەرى، باستاۋىش سىنىپ پەداگوگتەرى (جالپى 130-عا تارتا مامان) قاتىستى.
كونفەرەنسيا بارىسىندا وزبەكستان، گرۋزيا جانە رەسەيدەن كەلگەن قوناقتار باعدارلامانى جۇزەگە اسىرۋ بارىسىنداعى تاجىريبەلەرىمەن ءبولىسىپ، جاڭا يدەيالار ۇسىندى. جوبانىڭ ماقساتى مەن تاجىريبەلىك ناتيجەلەرى تالقىلاندى. جوبانىڭ 2024-2025 وقۋ جىلىنداعى قورىتىندىسى جانە مەكتەپتەردە باعدارلامانى دامىتۋ بويىنشا تىڭ باستامالار قاراستىرىلدى. سونىمەن قاتار، كونفەرەنسيا اياسىندا مۇعالىمدەردىڭ رەسپۋبليكالىق ادىستەمەلەر بايقاۋىنىڭ فينالى ءوتتى. فيناليستەر دۇرىس تاماقتانۋ نەگىزدەرىن وقىتۋ ادىستەمەلەرىمەن تانىستىردى.
«سالاۋاتتى تاماقتانۋ مەكتەبى» جوباسى ەلىمىزدە 2013 جىلدان بەرى الماتى قالاسى ءبىلىم باسقارماسىنىڭ ءبىلىم بەرۋدەگى جاڭا تەحنولوگيالاردىڭ قالالىق عىلىمي-ادىستەمەلىك ورتالىعىمەن، Nestlé كومپانياسىمەن، استانا قالاسى اكىمدىگىنىڭ ادىستەمەلىك ورتالىعىمەن جانە قازاق تاماقتانۋ اكادەمياسىمەن ىنتىماقتاستىقتا تابىستى ىسكە اسىرىلۋدا.
وقۋشىلار ءوز دەنساۋلىعىنا قالاي قامقورلىق جاساۋ كەرەكتىگىن جىل سايىن ۇيىمداستىرىلاتىن ساباقتاردا، كۆەستتەردە، ەكسكۋرسيالار مەن كونكۋرستاردا ۇيرەنەدى. ماسەلەن، باعدارلاماعا قاتىسۋشىلار، ياعني وقۋشىلار اتا-اناسىمەن بىرلەسىپ «سالاۋاتتى باستاما»، «سالاۋاتتى بالالار»، «سالاۋاتتى جانە باقىتتى ۇرپاق تاربيەلەيمىز!»، «ادام اعزاسىنا پايدالى تاعامدار ازىرلەيمىز!» فوتوكونكۋرستارى مەن «ءبىزدىڭ داستارحان» كورمەسىنە سۋرەتتەر جىبەردى، اسپازدىق دۇكەندەرگە ەكسكۋرسيا جاساۋ ارقىلى پايدالى ونىمدەردى تاڭداۋدى ۇيرەندى.
«مەكتەپ – بۇل ءومىر بويى ادەت-داعدىلاردى قالىپتاستىراتىن ورىن. ءبىز بالالاردىڭ ويلاۋىنىڭ قالاي وزگەرەتىنىن كورەمىز: ولار وزدەرىنە جانە اينالاسىنداعىلارعا مۇقيات بولادى. بۇل مۇعالىمدەردىڭ، اتا-انالاردىڭ جانە باعدارلاما سەرىكتەستەرىنىڭ بىرلەسكەن جۇمىسىنىڭ ناتيجەسى. ءبىزدىڭ «سالاۋاتتى تاماقتانۋ مەكتەبى» جوبامىز سالاماتتى مەكتەپ ۇلتتىق جوباسىن ىسكە اسىرۋعا جان-جاقتى ىقپال ەتەدى»، – دەيدى الماتى قالاسى ءبىلىم باسقارماسىنىڭ ءبىلىم بەرۋدەگى جاڭا تەحنولوگيالار قالالىق عىلىمي-ادىستەمەلىك ورتالىعىنىڭ اقپاراتتىق-باسپا ءبولىمىنىڭ باسشىسى تاتيانا ەجوۆا.
كونفەرەنسيانىڭ پلەنارلىق ءماجىلىسى مۇعالىمدەرگە ارنالعان ارنايى ترەنينگتەرمەن جالعاستى. وندا ءححى عاسىرداعى بالالاردىڭ فيزيكالىق، كوگنيتيۆتى جانە پسيحولوگيالىق دامۋ تەندەنسيالارى تالقىلاندى.
«سالاۋاتتى تاماقتانۋ مەكتەبى» جوباسىن ءبىلىم بەرۋ پروسەسىنە كىرىكتىرۋ ساباقتاردى پراكتيكالىق جانە زاماناۋي ەتۋگە كومەكتەسەدى. بالالار جاي عانا تىڭداپ قاراپ وتىرمايدى، وزدەرى قاتىسادى، تالقىلايدى، ۇيرەنەدى، قورىتىندى جاسايدى. بۇل – تاجىريبە ارقىلى وقىتۋ»، – دەدى استانا قالاسى اكىمدىگىنىڭ ادىستەمەلىك ورتالىعىنىڭ ءبولىم باسشىسى انار دوسمۇحامەت.
ءىس-شارا سوڭىندا قاتىسۋشىلارعا سەرتيفيكاتتار تابىستالدى.