ول ورال قالاسىنداعى اەروكلۋبتى اياقتاعاننان كەيىن ءوز ەركىمەن مايدانعا اتتانىپ، تۇنگى بومبالاۋشى ۇشاقتى باسقارۋ ءىسىن مەڭگەرىپ، 588ء-شى تۇنگى بومبالاۋشى اۆياسيالىق پولككە شتۋرمان-اتقىش بولىپ قابىلداندى. بۇل پولكتىڭ قۇرامىندا تەك قىز-كەلىنشەكتەردەن قۇرالعان ۇشقىشتار توبى قىزمەت ەتكەن.
جاۋدىڭ ۇرەيىن ۇشىرعان بۇل جاۋىنگەر ايەلدەرگە نەمىستەر «تۇنگى مىستاندار» دەگەن اتاۋ بەرگەن. قىزدار ۇرىس كەزىندە نىساناعا بەلگىلى ءبىر قاشىقتىقتا جاقىنداپ، ۇشاق قوزعالتقىشىن ءوشىرىپ، ءتۇن تىنىشتىعىن ءتىلىپ وتەتىن سىزىلتا شىققان ۇنمەن جاۋعا بومبا تاستايتىن. اسپاندا ۇشىپ كەلە جاتقان مىستانداي اسەر قالدىراتىن دىبىس قانا ەستىلەتىن. ال ولاردى كورۋ، اڭعارۋ مۇلدە مۇمكىن بولماعان.
جاۋىنگەر قىزدار ءبىر تۇندە 5-10 رەت ۇشىپ شىعىپ، جاۋ شەبىنە سوققى بەرەتىن. ولار ۇزاق ۋاقىت بويى ءپاراشيۋتسىز ۇشقان. سەبەبى، ءپاراشيۋتتىڭ ورنىنا بومبا كوبىرەك تيەپ، مايدانداعى ناتيجەلى ارەكەتتى كۇشەيتۋدى ماقسات تۇتقان. تەك 1944 جىلى عانا ولار ارنايى بۇيرىقپەن پاراشيۋتپەن ۇشۋعا مىندەتتەلدى.
حيۋاز دوسپانوۆا جاۋىنگەرلىك تاپسىرمالاردى وڭتۇستىك مايداندا، سولتۇستىك كاۆكازدا، زاكاۆكازەدە، ۋكراينا مەن بەلارۋس جەرىندە ورىندادى. ەكى رەت اۋىر جاراقات السا دا، ساپقا قايتا ورالىپ، سوعىستى بەرلين تۇبىندە جەڭىسپەن قارسى الدى. سوعىستى ءىى توپ مۇگەدەگى رەتىندە اياقتادى.
حيۋاز مانشۇك پەن ءاليانىڭ رۋحىن جالعاپ، 300-دەن استام جاۋىنگەرلىك ۇشۋعا قاتىسىپ، جاۋعا ويسىراتا سوققى بەرگەن. سوعىس جىلدارىندا بىرنەشە ناگرادامەن ماراپاتتالعان. تاۋەلسىز قازاقستان ونىڭ ەرلىگىن جوعارى باعالاپ، 2004 جىلى ەلدىڭ ەڭ جوعارى ماراپاتى — «حالىق قاھارمانى» اتاعىن بەردى.