الماتىدا الەۋمەتتىك تۇرعىدان وسال تۇرعىنداردى گازبەن قامتۋ جالعاسىپ جاتىر

الماتىدا الەۋمەتتىك تۇرعىدان وسال توپتاعى ازاماتتاردىڭ تۇرعىن ۇيلەرىن گازداندىرۋ جوباسى قارقىندى جۇزەگە اسىرىلىپ جاتىر. جوبانىڭ ماقساتى – ەرەكشە قولداۋدى قاجەت ەتەتىن تۇرعىنداردى سەنىمدى ءارى ءقاۋىپسىز گازبەن قامتۋ. جوبا الماتى قالاسى اكىمدىگىنىڭ، «حالىق بانك» اق جانە «حالىق» قايىرىمدىلىق قورىنىڭ قولداۋىمەن ىسكە اسىرىلىپ جاتىر. بۇل جۇمىس قارقىنىن ايتارلىقتاي جەدەلدەتىپ، قوسىلۋ اۋقىمىن كەڭەيتۋگە مۇمكىندىك بەردى. گازداندىرۋ كەزەڭ-كەزەڭمەن جۇرگىزىلىپ، ءۇي يەسىنە تولىقتاي دايىن كۇيدە بەرىلەدى. الەۋمەتتىك وسال ساناتقا جاتاتىن تۇرعىندار ەسەپتەگىش قۇرالداردى، گاز جابدىعىن، جىلىتۋ رادياتورلارىن جانە باسقا دا قاجەتتى ماتەريالداردى ساتىپ المايدى، بارلىق شىعىندى قور وتەيدى. كومەك الۋشىلاردىڭ ءتىزىمىن گازعا قوسىلۋ اقىسىن ءوز بەتىنشە تولەۋگە مۇمكىندىگى جوق ازاماتتار اراسىنان جەرگىلىكتى اتقارۋشى ورگان انىقتايدى. بۇگىندە 50 ۇيدە قۇرىلىس-مونتاج جۇمىسى اياقتالىپ، سونىڭ 42ء-سى گازعا قوسىلدى. تۇرعىندار زامانعا ساي گازبەن قامتۋدىڭ ارتىقشىلىقتارىن پايدالانا باستادى. سونىمەن قاتار ماماندار ەكىنشى كەزەڭنىڭ قامىن جاساپ، ۇيلەردى ارالاپ، قۇجات رەتتەۋ مەن جاڭا وتىنىشتەردى قاراستىرۋدى قولعا العان.