«وتباسى بانكىنىڭ» باسقارما ءتورايىمى ءلاززات يبراگيموۆا وسىلاي دەدى، دەپ حابارلايدى aqshamnews.kz
ونىڭ ايتۋىنشا، ەگەر ينفلياسيا دەڭگەيى جوعارى كۇيىندە قالسا، قازاقستاندىقتار تاعى دا شارشى مەتردىڭ قىمباتتاۋىنا كۋا بولادى. ال ينفلياسيالىق قىسىم تومەندەسە، نارىقتاعى باعا قوزعالىسى الدەقايدا باياۋ بولماق.
نارىقتىڭ جاعدايى
«مەنىڭ ويىمشا، 2026 جىل 2025 جانە 2024 جىلدارداعىداي وتەدى. ەگەر جالپى ينفلياسيا دەڭگەيى جوعارى بولسا، تۇرعىن ءۇي باعاسى وسەدى. ءبىراق ءبىزدىڭ كەپىلدەگى پاتەرلەر بويىنشا ايتارلىقتاي قىمباتتاۋ بايقالىپ وتىرعان جوق. نەگىزىنەن، نارىق تىنىش جاعدايدا تۇر. كەيبىر ساراپشىلار ونى توقىراۋ دەپ باعالايدى. اسىرەسە ەكىنشى نارىقتاعى تۇرعىن ۇيدە بەلسەندىلىك تومەن. ساتىپ الۋ-ساتۋ مامىلەلەرى كوپ ەمەس، يپوتەكا وتە قىمبات، ءار كەلىسىم ۇلكەن ساۋدالاسۋمەن جانە جەڭىلدىكپەن جاسالىپ جاتىر»، دەدى يبراگيموۆا.
قازاقستاندىقتارعا كەڭەس
بانك باسشىسى ءقازىر ءۇي الۋ-الماۋدى ويلاپ جۇرگەن ازاماتتارعا كەڭەس بەردى. ءلاززات يبراگيموۆانىڭ سوزىنشە، ەگەر بۇل ءبىرىنشى باسپانا بولسا جانە وتباسى جالدامالى پاتەردە تۇرسا، ساتىپ الۋدى كەيىنگە قالدىرماعان ءجون، بوتەننىڭ ۇيىنە جالداۋ اقىسى تولەنگەنشە، ءوز باسپاناسىنا اقشا سالعان دۇرىس.
ال ەگەر ساتىپ الۋ ينۆەستيسيا رەتىندە قاراستىرىلسا، ياعني كەيىن قايتا ساتۋدى كوزدەسە، وندا باسقا قارجىلىق قۇرالدارعا نازار اۋدارعان ءتيىمدى. مىسالى، باعالى قاعازدار نەمەسە جوعارى پايىزدىق مولشەرلەمەسى بار دەپوزيتتەر. سەبەبى، بانك باسشىسىنىڭ پىكىرىنشە، الداعى ۋاقىتتا تۇرعىن ءۇي باعاسىنىڭ كۇرت ءوسۋىن كۇتۋگە نەگىز جوق.