دورنبيرن قالاسىندا (اۋستريا) ەۋروپا، كاۆكاز جانە ورتالىق ازيا ەلدەرىنىڭ جەتەكشى ساۋلەتشىلەرى، ۋربانيستەرى، مەملەكەتتىك ينستيتۋتتارى مەن زەرتتەۋ ورتالىقتارىنىڭ وكىلدەرىن بىرىكتىرگەن SHARE Architecture Awards 2025 حالىقارالىق ساۋلەت فەستيۆالى ءوتتى.
ۇسىنعان ۋربانيستىك جوبالارى ءۇشىن SHARE Awards سىيلىعىمەن «الماتىباسجوسپار» عىلىمي-زەرتتەۋ ينستيتۋتى ماراپاتتالدى.
فەستيۆال SHARE Architects Society قولداۋىمەن وتكىزىلىپ، ارحيتەكتۋرالىق ديالوگتى دامىتۋ مەن وڭىردەگى ۇزدىك جوبالاردى ىلگەرىلەتۋگە باعىتتالعان كاسىبي پلاتفورما بولىپ تابىلادى.
2025 جىلى فورۋم تاريحىنداعى ەڭ اۋقىمدى باعدارلاما ۇسىندى. بارلىعى 20 ەلدەن 114 جوبا فينالدىق كەزەڭگە ىرىكتەلىپ، «ىسكە اسىرىلعان عيماراتتار»، «ينتەرەر» جانە «بولاشاق جوبالارى» ساناتتارى بويىنشا قازىلار القاسىنا ۇسىنىلدى.
بيىل قازاقستان فورۋمنىڭ نەگىزگى قاتىسۋشىلارىنىڭ بىرىنە اينالدى. «الماتىباسجوسپار» عزي باس ديرەكتورى اسحات ءسادۋوۆ فەستيۆالدىڭ رەسمي باعدارلاماسىنا شاقىرىلدى.
بايانداما بارىسىندا ول الماتىنى دامىتۋدىڭ ستراتەگيالىق باعىتتارىن تانىستىردى. اتاپ ايتقاندا: قالانىڭ پوليسەنترلىك مودەلى، قالالىق ورتانىڭ ساپاسىن ارتتىرۋ جانە قوعامدىق كەڭىستىكتەردى دامىتۋ باعدارلامالارى، قالا قۇرىلىسىنا عىلىمي-تالدامالىق ءتاسىلدى ەنگىزۋ، سونداي-اق قالالىق ينفراقۇرىلىمنىڭ تۇراقتىلىعىنا قاتىستى حالىقارالىق ستاندارتتاردى ەنگىزۋدى ۇسىندى.
ءىس-شارا قورىتىندىسى بويىنشا اسحات ءسادۋوۆ «الماتىباسجوسپار» عزي ۇجىمىنىڭ زاماناۋي ۋربانيستىك ساياساتتى قالىپتاستىرۋعا جانە حالىقارالىق ارحيتەكتۋرالىق ديالوگتى دامىتۋعا قوسقان ۇلەسىن مويىنداعان SHARE Awards سىيلىعىمەن ماراپاتتالدى.
«بۇل ماراپات الماتىداعى ۋربانيستيكالىق وزگەرىستەرگە دەگەن حالىقارالىق قىزىعۋشىلىقتىڭ ارتىپ كەلە جاتقانىن ايقىن دالەلدەپ، قازاقستاننىڭ كاسىبي ساۋلەتشىلەر قاۋىمداستىعىگداعى بەدەلىن كۇشەيتە ءتۇستى»، – دەدى ا. ءسادۋوۆ.