ەكىباستۇزدا كافە ىشىندە بولعان جانجالدان كەيىن بويجەتكەندەردىڭ ءبىرى تۇزەتۋ جۇمىستارىنا جەگىلدى، - دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
ىشكى ىستەر مينيسترلىگىنىڭ مالىمەتىنشە، ماس كۇيدەگى ەكى قىزدىڭ اراسىندا جانجال تۋىنداپ، سوڭى توبەلەسكە ۇلاسقان.
"تەكسەرۋ بارىسىندا كەلۋشىلەردىڭ اراسىندا جانجال شىعىپ، ول ءوزارا ۇرىپ-سوعۋعا ۇلاسقانى انىقتالدى. قىزدار ءبىر-بىرىنىڭ بەتىنە الاقانمەن ءۇش رەتتەن سوققى بەرىپ، شاشتارىنان تارتقان. وقيعا وزگە كەلۋشىلەردىڭ كوزىنشە بولعان، توبەلەستى مەكەمە قىزمەتكەرلەرى اجىراتتى"، – دەپ حابارلادى پوليسيا.
سوت ءىس ماتەريالدارىن قاراپ، جانجالعا قاتىسۋشىلاردىڭ ءبىرىن كىنالى دەپ تانىدى. وعان 100 ايلىق ەسەپتىك كورسەتكىش (اەك) كولەمىندە تۇزەتۋ جۇمىستارى تۇرىندەگى جازا تاعايىندالدى.