قازاقستان مەن فرانسيا اراسىنداعى اۆياسيالىق ارىپتەستىك جاڭا دەڭگەيگە شىقتى. Airbus-پەن العاشقى 25 A320neo ۇشاعىن جەتكىزۋ جونىندەگى كەلىسىم پىسىقتالىپ، تاعى وسىنشا اۋە كەمەسىنە دەيىن ارتتىرۋ مۇمكىندىگى قاراستىرىلدى.
كولىك مينيسترلىگىنىڭ حابارلاۋىنشا، پاريج قالاسىندا قازاقستان-فرانسيا ىسكەرلىك كەڭەسىنىڭ وتىرىسى جانە ەكونوميكالىق ىنتىماقتاستىق جونىندەگى 16-ۇكىمەتارالىق كوميسسيانىڭ ءماجىلىسى ءوتتى. ءىس-شارالارعا قازاقستان رەسپۋبليكاسى كولىك ۆيسە-مينيسترى تالعات لاستايەۆ قاتىستى.
نەگىزگى وقيعا Airbus A320neo اۋە كەمەلەرىن جەتكىزۋ جونىندەگى مەموراندۋم پاپكالارىمەن الماسۋ ءراسىمى بولدى. قۇجاتتا «العاشقى 25 ۇشاقتى جەتكىزۋ جانە كەيىننەن قوسىمشا سانىن 25 ۇشاققا دەيىن ارتتىرۋ مۇمكىندىگى» قاراستىرىلعان.
كەزدەسۋ بارىسىندا تالعات لاستايەۆ پەن Airbus كومپانياسىنىڭ ۆيسە-پرەزيدەنتى شاربەل يۋزكاتلي 2031 جىلعا جوسپارلانعان اۋە كەمەلەرىن جەتكىزۋ مەرزىمدەرى جانە ونى جەدەلدەتۋ مۇمكىندىكتەرىن تالقىلادى. سونداي-اق، ۆيسە-مينيستر Airbus-پەن بىرلەسىپ اۆياسيالىق وقۋ ورتالىعىن قۇرۋ جانە اۋە كەمەلەرىن ليزينگكە بەرۋ ماسەلەلەرىن كوتەردى.
ۇاك اياسىندا حالىقارالىق سەرىكتەستەرمەن الداعى ىنتىماقتاستىق ماسەلەلەرى دە تالقىلاندى: TAV Airports كومپانياسىمەن — قازاقستان اۋەجايلارى ينفراقۇرىلىمىن جاڭعىرتۋ، Alstom كومپانياسىمەن — ونەركاسىپتىك كووپەراسيا باعىتىندا.
ەكى ەل اراسىنداعى كولىك بايلانىسىن جاقسارتۋ ءۇشىن پاريج–استانا رەيسىن قايتا اشۋ جانە شىمكەنت–نيسسا باعىتى بويىنشا اۋە قاتىناسىن ىسكە قوسۋ ماسەلەلەرى قاراستىرىلدى.