قازاقستان كۇرەس فەدەراسياسىنىڭ پرەزيدەنتى داۋلەت تۇرلىحانوۆ بۇل شەشىمى تۋرالى الەۋمەتتىك جەلىدە مالىمدەپ، كەيىنگى ءتورت جىلداعى جۇمىستى قورىتىندىلاپ، ارىپتەستەرىنە العىس ءبىلدىردى.
تۇرلىحانوۆ ءوز جازباسىندا بۇل قادامدى “تەرەڭ العىس سەزىمىمەن جانە ىشكى تىنىشتىقپەن” قابىلداعانىن اتاپ ايتتى.
"بۇگىن مەن قازاقستان كۇرەس فەدەراسياسىنىڭ پرەزيدەنتى قىزمەتىن اياقتاۋ تۋرالى شەشىم قابىلدادىم. بۇل ءساتتى مەن تەرەڭ العىس سەزىمىمەن جانە ىشكى تىنىشتىقپەن قابىلدايمىن"، - دەپ جازدى ول.
ول فەدەراسيامەن بىرگە اتقارعان جۇمىستى باعالاپ، باپكەرلەردەن باستاپ دارىگەرلەر مەن سەرىكتەستەرگە دەيىن بارلىق ماماندارعا العىس ايتتى.
ول جەتىستىكتەردى دە دە اتاپ ءوتتى.
تۇرلىحانوۆتىڭ باسشىلىعى كەزەڭىندە قازاقستان كۇرەسى بىرنەشە ماڭىزدى ناتيجەگە قول جەتكىزگەن:
پاريج-2024 وليمپياداسىنىڭ كۇمىس جۇلدەسى؛
ەرەسەكتەر اراسىندا – 3 الەم چەمپيونى؛
23 جاسقا دەيىن – 3 الەم چەمپيونى؛
20 جاسقا دەيىن – 4 الەم چەمپيونى؛
17 جاسقا دەيىن – 4 الەم چەمپيونى.
"بۇل جەڭىستەر – ءبىزدىڭ ءبىرتۇتاس كوماندامىزدىڭ ەڭبەگى، كۇرەسىمىزدىڭ بولاشاعىنا سەنگەن، تاباندىلىق تانىتقان، جانكەشتىلىكپەن جۇمىس ىستەگەن ادامداردىڭ ورتاق جەتىستىگى"، - دەدى ول.
تۇرلىحانوۆ قازاق كۇرەسىنىڭ حالىقارالىق ارەناداعى بەدەلىن ارتتىرۋ، ءىرى تۋرنيرلەردى ۇيىمداستىرۋ جانە جاس تالانتتارعا جول اشۋ – وسى كەزەڭنىڭ باستى ناتيجەلەرى ەكەنىن ايتتى.
سونىمەن قاتار، ول فەدەراسياعا جاڭا باسشىلىق كەلۋى سپورتتىڭ دامۋىنا تىڭ سەرپىن بەرەتىنىنە سەنىم ءبىلدىردى.
"سپورت تەك ساباقتاستىق پەن العا جىلجۋ بار جەردە داميدى. جاڭا كوماندا جاڭا كوزقاراس، تىڭ يدەيالار جانە ءبىزدىڭ سۇيىكتى سپورتىمىزدى دامىتۋعا تىڭ سەرپىن اكەلەتىنىنە شىن جۇرەكتەن سەنەمىن"، - دەدى ول.
سوڭىندا تۇرلىحانوۆ ەلگە قىزمەت ەتۋدى جالعاستىراتىنىن اتاپ ءوتتى.
"مەن وتانىمىزعا قىزمەت ەتۋدەن ەشقاشان باس تارتپايمىن. قازاقستاندى دامىتۋ – مەنىڭ باستى باسىمدىعىم، جانە ەلگە، قوعامعا پايدا تيگىزە الاتىن كەز كەلگەن جەردە ءوز ۇلەسىمدى قوسا بەرەتىن بولامىن"، - دەپ جازدى تۇرلىحانوۆ.