ريمدەگى پياسسا دەل كۆيرينالە الاڭىندا ميلان-كورتينا-2026 قىسقى وليمپيادا ويىندارىنىڭ الاۋىن جاعۋ سالتاناتتى ءراسىمى ءوتتى، دەپ حابارلايدى aqshamnews.kz
گرەكيادان الدىڭعى كۇنى جەتكىزىلگەن وليمپيادا الاۋىن يتاليا پرەزيدەنتى سەردجو ماتتارەللا رەسمي تۇردە تۇتاتتى. شاراعا حالىقارالىق وليمپيادالىق كوميتەتىنىڭ پرەزيدەنتى كيرستي كوۆەنتري، وليمپيادا ويىندارىن ۇيىمداستىرۋ كوميتەتىنىڭ باسشىسى دجوۆانني مالاگو جانە يتاليانىڭ ۇلتتىق وليمپيادالىق كوميتەتىنىڭ جەتەكشىلەرى قاتىستى.
كيرستي كوۆەنتري قۇتتىقتاۋ سوزىندە وليمپيادا الاۋىنىڭ ۇرپاقتار ساباقتاستىعىن بايلانىستىراتىن جانە وليمپيادالىق قوزعالىستىڭ باستاپقى ءمانى – شابىتتاندىرۋدى، بىرىكتىرۋدى جانە ءار سپورتشىنىڭ ەشقانداي كەمسىتۋسىز جارىسقا قاتىسۋ قۇقىعىن قورعاۋدى ەسكە سالاتىن سيمۆولدىق كۇشى بار ەكەنىن اتاپ ءوتتى.
سونداي-اق ول يتاليادا وتەتىن ويىندار ءوزىنىڭ پرەزيدەنت رەتىندەگى العاشقى قىسقى وليمپياداسى بولاتىنىن ايتىپ، بۇل ويىندار سپورتشىلار ءۇشىن دە، بۇكىل الەم ءۇشىن دە جارقىن وقيعاعا اينالاتىنىنا سەنىم ءبىلدىردى.
ال يتاليا پرەزيدەنتى سەردجو ماتتارەللا وليمپيادا الاۋىنىڭ بەيبىتشىلىك، بىرلىك جانە ءوزارا قۇرمەت بەلگىسى ەكەنىن ەرەكشە اتاپ ءوتتى. ونىڭ ايتۋىنشا، وليمپيادا مەن پاراليمپيادا ويىندارى ادامزاتپەن بارىنە ورتاق، تۇسىنىكتى تىلدە سويلەسە الاتىن ەرەكشە كۇشكە يە ەكەنىن جەتكىزدى. سونداي-اق بۇل ويىندار تەڭدىك، قۇرمەت جانە العا ۇمتىلۋ سياقتى قۇندىلىقتاردى ەسكە سالاتىنىن ايتتى.
ماتتارەللا ويىندارعا دەيىنگى جولدىڭ جاۋلاسۋ مەن وشپەندىلىكتەن باس تارتۋ كەزەڭىنە اينالۋىنا ءۇمىت ارتتى. ول ميلان مەن كورتينادا ويىنداردى بىرلەسىپ وتكىزۋ يتاليانىڭ اشىقتىعى مەن ۇلتتىق بىرلىگىنىڭ ايقىن كورىنىسى ەكەنىن ايتتى.
ءسوز سوڭىندا دجوۆانني مالاگو پرەزيدەنتكە الاۋدى تاپسىردى. ال يتاليا پرەزيدەنتى الاڭدا ورناتىلعان وليمپيادالىق شامدى جاقتى.
ايتا كەتەيىك، الاۋ ريمگە جەتكىزىلگەننەن كەيىن ەستافەتانىڭ العاشقى مەترلەرىن دجوۆانني مالاگو مەن تەننيسشى جاسمين پاوليني ءجۇرىپ ءوتتى.
يتاليا اۋماعىنداعى وليمپيادا الاۋىنىڭ رەسمي ەستافەتاسى 6 جەلتوقساندا باستالادى. مارشرۋت ەلدىڭ ماڭىزدى مادەني جانە تاريحي ايماقتارىن، سونىڭ ىشىندە كوپتەگەن يۋنەسكو نىسانىن قامتيدى.
ميلان-كورتينا-2026 قىسقى وليمپيادا ويىندارى 6-22 اقپان ارالىعىندا وتەدى.