الماتى قالاسىندا حالىقارالىق ەرىكتىلەر كۇنىنە وراي ۇيىمداستىرىلعان قالالىق ەرىكتىلەر فورۋمى ءوتتى، دەپ حابارلايدى aqshamnews.kz
ءىس-شارا الماتى قالاسى جاستار ساياساتى باسقارماسىنىڭ قولداۋىمەن جۇزەگە استى. جيىنعا ەرىكتىلىك ۇيىمداردىڭ جەتەكشىلەرى، جاستار بىرلەستىكتەرى، الەۋمەتتىك جانە ەكولوگيالىق باستامالاردىڭ وكىلدەرى قاتىستى. 2025 جىلى الماتىلىق ەرىكتىلەر قالادا ەرىكتىلىكتى دامىتۋ بويىنشا اۋقىمدى ءارى جۇيەلى جۇمىس اتقاردى: 50 مىڭنان استام ەرىكتى تىركەلىپ، ولاردىڭ 10 مىڭنان استامى الەۋمەتتىك، ەكولوگيالىق جانە ءبىلىم بەرۋ باستامالارىنا العاش رەت تارتىلعان جاڭا قاتىسۋشىلار بولدى.
ەرىكتىلىك قوزعالىستىڭ قىزمەتى 42 ءىرى ۇيىمدى بىرىكتىرەتىن جانە جان-جاقتى ادىستەمەلىك ءارى ۇيىمداستىرۋشىلىق قولداۋ كورسەتەتىن ەرىكتىلەر فرونت-كەڭسەسى ارقىلى رەتتەلەدى. الەۋمەتتىك اكسيالار اياسىندا 80-نەن استام وتباسىنا اتاۋلى كومەك كورسەتىلىپ، حالىقتىڭ وسال توپتارىنا قولداۋ ءبىلدىرىلدى، «Eco Qala Fest» پەن «جاسەكوپاترۋلدى» قوسقاندا ەكولوگيالىق جوبالار مەن سەنبىلىكتەر وتكىزىلدى. اشىق اسپان استىنداعى كينوكورسەتىلىمدەر، دارىستەر مەن كەزدەسۋلەر ۇيىمداستىرىلىپ، جاسوسپىرىمدەر مەن جاستارعا ارنالعان 60-تان استام ءبىلىم بەرۋ كۋرسى وتكىزىلدى.
سونىمەن قاتار، 800-دەن استام ەرىكتى تجد-مەن ارىپتەستىك اياسىندا توتەنشە جاعدايلارعا دايىندىق بويىنشا ارنايى وقىتۋدان ءوتتى، ال «جاقسىلىق ىستەر مارافونى» شەڭبەرىندەگى قايىرىمدىلىق ءىس-شارالارعا 12 مىڭنان استام ادام تارتىلدى. فورۋم بارىسىندا ەڭ بەلسەندى ەرىكتىلەر مەن ەرىكتىلىك ۇيىمدار ارنايى العىس حاتتارمەن جانە سىيلىقتارمەن ماراپاتتالدى. بۇل ولاردىڭ ەڭبەگىنە دەگەن قۇرمەتپەن قاتار، جاڭا قاتىسۋشىلارعا دا شابىت بەردى.