2025 جىلى قازاقستاندا يسلامدىق يپوتەكا بەرىلە باستايدى دەپ كۇتىلگەن ەدى. الايدا بۇل نورما ءقازىر پارلامەنت قاراستىرىپ جاتقان «بانكتەر جانە بانك قىزمەتى تۋرالى» زاڭ جوباسىنا ەنگىزىلمەگەن، دەپ حابارلايدى aqshamnews.kz
“وتباسى بانك” باسشىسىنىڭ ايتۋىنشا، سوڭعى ەكى اپتادا الەۋمەتتىك جەلىلەردە ارنايى چەللەندج ءجۇرىپ جاتىر. وندا ازاماتتار يسلامدىق يپوتەكانى ىسكە قوسۋدى تالاپ ەتكەن.
«بۇل – وتە ۇلكەن سۇرانىس. حالىق، اسىرەسە جاستار، ءدىني قاعيدالاردى ۇستانادى. زاڭ جوباسى ماجىلىسكە ەنگىزىلگەن كەزدە تۇرعىن ءۇي قۇرىلىس جيناق جۇيەسىندە يسلامدىق قارجىلاندىرۋ نورماسى بولعان. ءبىراق، وكىنىشكە قاراي، زاڭ جوباسى شىققان كەزدە ول نورما جوعالىپ كەتتى. ءبىز ەندى سەناتقا جۇگىنۋدى جوسپارلاپ وتىرمىز. جۇمىس توبىنا قاتىسىپ، وسى ماسەلەنى قايتا كوتەرۋگە بولادى ما دەگەن ويدامىز»، – دەدى يبراگيموۆا.
مەموراندۋم جانە جوسپارلار
2024 جىلدىڭ جەلتوقسانىندا «وتباسى بانك»، قازاقستان قۇرىلىسشىلار وداعى جانە يسلامدىق قارجى مەن بيزنەس قاۋىمداستىعى يسلامدىق قارجى يندۋسترياسىن دامىتۋ جونىندە مەموراندۋمعا قول قويعان بولاتىن. سول كەزدە 2025 جىلى يسلامدىق يپوتەكا ىسكە قوسىلادى دەپ جوسپارلانعان ەدى. بانك تۇرعىن ءۇي قۇرىلىس جيناق جۇيەسى ارقىلى يسلامدىق قاعيدالارعا ساي باسپانا الۋدىڭ جولدارىن قاراستىرۋدى كوزدەگەن.
يسلامدىق يپوتەكانىڭ ەرەكشەلىگى
يسلامدىق يپوتەكا – يسلامدىق قارجى قۇقىعىنىڭ قاعيدالارىنا نەگىزدەلگەن جۇيە. بۇل جۇيەدە پايىزدىق ۇستەمە اقى الۋعا قاتاڭ تىيىم سالىنادى. ءداستۇرلى بانكتىك سەكتوردا يپوتەكا نەسيەگە پايىز قوسۋمەن بەرىلەدى. ال يسلامدىق قارجى جۇيەسىندە پايىز زاڭسىز دەپ سانالادى، سەبەبى ول ادىلدىك پەن ادالدىق قاعيدالارىن بۇزادى.