ماڭعىستاۋ وبلىستىق كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى پوليسيا قىزمەتكەرلەرىن قورلاپ، وقيعانىڭ ۆيدەوسىن TikTok-قا جاريالاعان جاسوسپىرىمگە قاتىستى ءىستى قارادى، دەپ حابارلايدى aqshamnews.kz
ءىس ماتەريالدارىنا سايكەس، كامەلەتكە تولماعان ا. مەملەكەتتىك ءنومىرسىز موتوسيكل ايداعانى ءۇشىن ۇستالعان. ول ۇستالعان كەزدە پوليسەيلەردىڭ ار-نامىسىنا تيەتىن بالاعات سوزدەر ايتىپ، بولعان جايتتى ۆيدەوعا ءتۇسىرىپ، ونى TikTok الەۋمەتتىك جەلىسىنە جاريالاعان.
مەملەكەتتىك ايىپتاۋشى وعان 30 ساعات قوعامدىق جۇمىس تۇرىندەگى جازا تاعايىنداۋدى سۇرادى. جابىرلەنۋشى پوليسيا قىزمەتكەرى دە ءجاسوسپىرىمدى جاۋاپكەرشىلىككە تارتۋ تالابىن قولدادى. ال سوتتالۋشى كىناسىن تولىق مويىنداپ، وكىنىش ءبىلدىرىپ، جازانى جەڭىلدەتۋدى ءوتىندى.
سوت نە شەشتى
سوتتا ءجاسوسپىرىمنىڭ كىناسى ونىڭ ءوز مويىنداۋى، جابىرلەنۋشىنىڭ ايعاقتارى، ۆيدەوماتەريالدار، سونداي-اق پسيحولوگو-فيلولوگيالىق جانە امبۋلاتوريالىق پسيحولوگو-پسيحياتريالىق ساراپتاما قورىتىندىلارى ارقىلى دالەلدەنگەنى ايتىلدى. ءىستى قاراۋ ناتيجەسىندە ول ق ر قك-نىڭ 378-بابى 2-بولىگى («بيلىك وكىلىن قورلاۋ») بويىنشا كىنالى دەپ تانىلىپ، 30 ساعات قوعامدىق جۇمىسقا سوتتالدى.
سوت ونىڭ كامەلەتكە تولماعانىن، شىن جۇرەكتەن وكىنگەنىن، بۇرىن سوتتالماعانىن جانە مىنەزدەمەسىنىڭ جاقسى ەكەنىن جەڭىلدەتەتىن ءمان-جايلار رەتىندە تانىدى. ال اۋىرلاتاتىن ءمان-جايلار انىقتالعان جوق.