1986 جىلعى جەلتوقسان وقيعاسىنىڭ قاھارماندارىن ەسكە الۋ جانە تاۋەلسىزدىك رۋحىن جاس ۇرپاق بويىنا ءسىڭىرۋ ماقساتىندا الماتىنىڭ الاتاۋ اۋدانىنداعى مەكتەپتەرىنىڭ وقۋشىلارى اراسىندا “ماڭگى ويانعان نامىس” اتتى ونەر بايقاۋى ۇيىمداستىرىلعان بولاتىن. ۇيىمداستىرۋشىلار – “جەلتوقسان اقيقاتى” رەسپۋبليكالىق قوعامدىق بىرلەستىگى، “نۇرلى شۋاق” قوعامدىق قورى، “پاراساتتى جاستار” جانە “حالىقارالىق “قازاق ءتىلى” قوعامى” قوعامدىق بىرلەستىكتەرى.
”بايقاۋدىڭ ماقساتى – جەلتوقسان قاھارماندارىنىڭ ەرلىگىن ناسيحاتتاۋ، ونەر ارقىلى ۇلتتىق قۇندىلىقتار مەن وتانعا دەگەن سۇيىسپەنشىلىكتى ارتتىرۋ، تالانتتى وقۋشىلاردى انىقتاۋ جانە قولداۋ. بايقاۋعا الاتاۋ اۋدانىنداعى 20 مەكتەپتەن 100-دەن اسا وقۋشى قاتىسىپ، ىرىكتەۋ كەزەڭدە 30 جەتكىنشەكتىڭ باعى جاندى. جەڭىمپازداردىڭ ەشقايسىسىن ءبولىپ-جارماي، بارىنە باعالى سىيلىقتار تابىستادىق»، – دەيدى “جەلتوقسان اقيقاتى” رەسپۋبليكالىق قوعامدىق بىرلەستىگىنىڭ ءتوراعاسى بولات قۇرىمبايەۆ.
بايقاۋدىڭ “كوركەم ءسوز” جانرىندا بالالار تاۋەلسىزدىك جانە پاتريوتتىق تاقىرىبىندا شىعارما جازدى. “ۆوكال” نوميناسياسىندا جاندى داۋىسپەن پاتريوتتىق اندەر شىرقادى. “اقىندىق ونەردە” جەتكىنشەكتەر اۆتورلىق ولەڭىن ورىندادى. ال “بەينەلەۋ ونەرى” جانرىندا جەلتوقسان رۋحىن، باتىرلار ەرلىگىن، بەيبىت ءومىردى بەينەلەيتىن سۋرەتتەرىن ۇسىندى.
”مەنىڭ قىزىم سەزىم قاناتبەك N205 مەكتەپتىڭ 5 “ە” سىنىبىندا وقيدى. ول بۇگىنگى بايقاۋدا “بەينەلەۋ ونەرى” نوميناسياسىنىڭ جەڭىمپازى اتاندى. سۋرەتىندە بايتەرەكتى بەينەلەپتى. كوكپەڭبەك اسپان دا ماعان ادەمى اسەر سىيلادى. جاپ-جاسىل ءشوپتىڭ ۇستىندە داستارحان جايىپ، كوڭىلدى وتىرعان وتباسىنىڭ بەينەسى دە جۇرەگىمدى تەربەدى. قىزىمنىڭ وسىنداي ەگەمەن ەلدە، باقىتتى وتباسىندا ءومىر ءسۇرىپ جاتقانىنا مىڭ ءتاۋبا ايتامىن”، - دەيدى الماتىلىق اتا-انا جادىرا قاراكوزەيەۆا.
بايقاۋدىڭ العاشقى ىرىكتەۋ كەزەڭى ونلاين فورماتتا ۇيىمداستىرىلعان بولاتىن. ال ءبىز ەكىنشى شەشۋشى كەزەڭىنە، ياعني مەگاپوليستەگى وقۋشىلاردىڭ يننوۆاسيالىق شىعارماشىلىق ورتالىعىندا وتكەن، ونلاين-سايىستان ۇزدىك دەپ تانىلعان بالالاردىڭ باسى قوسىلعان گالا-كونسەرتىنە قاتىستىق. الاتاۋلىق ونەرلى وقۋشىلار كونسەرت قويدى. مەرەيى ۇستەم بولعان جاس دوستار ماراپاتتالدى. بارلىق قاتىسۋشىعا سەرتيفيكات تابىستالدى.