پرەزيدەنتتىڭ ايتۋىنشا، "تازا قازاقستان" جالپىۇلتتىق اكسياسى قورشاعان ورتانى قالپىنا كەلتىرۋگە، ەكولوگيالىق جاۋاپكەرشىلىك مادەنيەتىن دارىپتەۋگە ۇلەس قوسقىسى كەلەتىن مىڭداعان ازاماتتى بىرىكتىردى. بۇل جوبا بۇۇ-نىڭ ورنىقتى دامۋ سالاسىنداعى جاھاندىق باستامالارىمەن ۇندەسەدى.
"وسى ورايدا الماتى قالاسىن بىرىككەن ۇلتتار ۇيىمىنىڭ قولداۋىمەن حالىقارالىق ىنتىماقتاستىق حابىنا اينالدىرۋ نيەتىن قۇپتايمىز. ورتالىق ازيا مەن اۋعانستانعا ارنالعان ورنىقتى دامۋ ماقساتتارى جونىندەگى بۇۇ وڭىرلىك ورتالىعىنىڭ قۇرىلۋى وسىنداي مۇمكىندىككە جول اشتى"، دەدى قاسىم-جومارت توقايەۆ.
پرەزيدەنتتىڭ سوزىنشە، بۇل رەتتە الماتىدا بۇۇ ەرىكتىلەر باعدارلاماسىنىڭ سۋبوڭىرلىك كەڭسەسىنىڭ اشىلۋى قازاقستاننىڭ ازاماتتىق بەلسەندىلىكتى جانە جاھاندىق سەرىكتەستىكتى دامىتۋعا بەيىل ەكەنىن كورسەتەدى.
اتالعان باستامالار الەمدەگى سىن-قاتەرلەردى بىرلەسكەن كۇش-جىگەر مەن ءوزارا سەنىمنىڭ ارقاسىندا ەڭسەرۋگە بولاتىنىن راستايدى.
"بارشا ەلدىڭ ەرىكتىلەرىن بۇۇ-نىڭ قورشاعان ورتانى قورعاۋ، الەۋمەتتىك ينتەگراسيا جانە جاستاردى قولداۋ باعىتىنداعى باستامالارىنا قوسىلىپ، ءوزارا تاجىريبە الماسۋعا جانە بىرلەسكەن جوبالاردى جۇزەگە اسىرۋعا شاقىرامىز. قازاقستان بۇۇ ەرىكتىلەر باعدارلاماسىنا ريزاشىلىعىن بىلدىرەدى. سونىمەن قاتار جاستاردىڭ، ايەلدەردىڭ جانە شالعاي ايماق تۇرعىندارىنىڭ مۇمكىندىكتەرىن كەڭەيتۋ ءۇشىن سەرىكتەستىك اياسىن كەڭەيتۋگە ۇندەيدى"، دەدى قاسىم-جومارت توقايەۆ.
مەملەكەت باسشىسى سونىمەن بىرگە سەسسيا قاتىسۋشىلارىن ادامزات يگىلىگى ءۇشىن بىرلەسىپ ارەكەت ەتۋگە ۇندەدى.
"بيىل بىرىككەن ۇلتتار ۇيىمىنىڭ قۇرىلعانىنا 80 جىل تولدى. وسى ماڭىزدى كەزەڭدە بارشاڭىزدى ءادىل ءارى جاسىل الەم قالىپتاستىرۋ جولىندا ىنتىماق-بىرلىگىمىزدىڭ بەرىك ەكەنىن كورسەتىپ، ادامزات يگىلىگى ءۇشىن بىرلەسىپ ارەكەت ەتۋگە شاقىرامىن. قازاقستان ايتۋلى جىل اياسىندا جانە ودان كەيىنگى كەزەڭدەردە دە الەۋمەتتىك ماڭىزى بار ەرىكتىلەر قىزمەتىن قولداۋ ءۇشىن بۇۇ-عا مۇشە بارلىق مەملەكەتپەن جانە ازاماتتىق قوعاممەن ىنتىماقتاسا جۇمىس ىستەۋگە ءاردايىم دايىن"، - دەدى ول.