سۋدىڭ «قارا نارىعىنا» قارسى ءىس-شارالار اياسىندا توبىل-تورعاي باسسەين ينسپەكسياسىنىڭ ماماندارى ارنايى سۋ پايدالانۋ رۇقساتتارىنا تالداۋ جاسادى.
ناتيجەسىندە جاڭا سۋ كودەكسىنىڭ 53-بابىندا كورسەتىلگەن قاداعالاۋ وكىلەتتىگىنە سايكەس جۇرگىزىلگەن تەكسەرىس بارىسىندا قوستاناي وبلىسى رۋدنىي قالاسىنداعى ءبىر كاسىپورىننىڭ ۇڭعىمادان ارنايى رۇقساتسىز سۋ الىپ كەلگەنى انىقتالدى، - دەپ حابارلايدى Aqshamnews.kz سالا مينيسترلىگىنە سىلتەمە جاساپ.
كاسىپورىنعا زاڭ بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 141-بابىنىڭ 2ء-بولىمى، ياعني «سۋعا مەملەكەتتىك مەنشىك قۇقىعىن بۇزۋ» بابى بويىنشا 1 671 100 تەڭگە كولەمىندە ايىپپۇل سالىندى. بۇل - توبىل–تورعاي باسسەين ينسپەكسياسى جىل باسىنان بەرى سالعان ەڭ ءىرى ايىپپۇل.
2025 جىلى ينسپەكسيا اكىمشىلىك قۇقىق بۇزۋشىلىق تۋرالى كودەكستىڭ 141-بابىن بۇزعان بەس دەرەك تىركەدى. وسى بۇزۋشىلىقتار ءۇشىن جالپى سوماسى 2 339 540 تەڭگە ايىپپۇل سالىندى. بارلىق زاڭبۇزۋشىعا ارنايى سۋ پايدالانۋ رۇقساتىن الۋ جونىندە نۇسقاما بەرىلىپ، ءتيىستى ۇسىنىستار جاسالدى.
«جاڭا سۋ كودەكسىنە ەنگىزىلگەن قاداعالاۋ وكىلەتتىكتەرى باسسەين ينسپەكسيالارىنا ازاماتتاردىڭ وتىنىشتەرىنە، سۋ زاڭناماسىن بۇزۋ تۋرالى مالىمەتتەرگە جانە مونيتورينگ ناتيجەلەرىنە جەدەل ارەكەت ەتۋگە مۇمكىندىك بەرەدى. ينسپەكتورلار وقيعا ورنىنا دەرەۋ بارىپ، زاڭبۇزۋشىلىق راستالعان جاعدايدا اكىمشىلىك ايىپپۇل سالا الادى. بۇل زاڭسىز سۋ الۋعا جانە سۋدىڭ «قارا نارىعىنا» قارسى ءتيىمدى كۇرەس جۇرگىزۋگە جول اشادى»، – دەدى توبىل-تورعاي باسسەين ينسپەكسياسىنىڭ باسشىسى المات ابجانوۆ.