مەملەكەت باسشىسىنىڭ تاپسىرماسى بويىنشا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭعا سايكەس ارناۋلى مەملەكەتتىك قور قاراجاتىنان قارجىلاندىرىلاتىن ەل وڭىرلەرىندە الەۋمەتتىك ماڭىزى بار جوبالاردى ىسكە اسىرۋ جۇزەگە اسىرىلۋدا، دەپ حابارلايدى aqshamnews.kz
ۇكىمەت ۇلىتاۋ وبلىسى جاڭاارقا اۋدانى مىڭادىر ستانساسىندا 80 ورىندىق مەكتەپ سالۋعا 1،2 ملرد تەڭگەدەن استام قاراجات ءبولۋ تۋرالى شەشىم قابىلدادى.
جۇمىس ىستەپ تۇرعان مەكتەپ وسى ايماقتاعى جالعىز ءبىلىم بەرۋ مەكەمەسى بولىپ سانالادى. عيمارات 1981 جىلى سالىندى، 2000 جىلدارى قوسىمشا كەڭەيتىلدى. بۇگىنگى تاڭدا مەكتەپ شامادان تىس تولعان: جوباداعى 60 ورىننىڭ ورنىنا مۇندا 123 وقۋشى وقىپ جاتىر. مەكتەپتە حيميا، بيولوگيا، فيزيكا جانە گەوگرافيا بويىنشا زەرتحانالىق كابينەتتەر، سپورت زالى، شەبەرحانا، ەڭبەك كابينەتتەرى جوق.
قۇرىلىستى باستاۋ 2025 جىلدىڭ I توقسانىنا جوسپارلانعان. جوبانى ىسكە اسىرۋ وقۋشى ورىندارىنىڭ سانىن ۇلعايتۋعا مۇمكىندىك بەرەدى جانە زاماناۋي ءبىلىم بەرۋ تالاپتارىنا سايكەس بالالاردى وقىتۋ ءۇشىن قاجەتتى قولايلى جاعداي جاسايدى.
بۇعان دەيىن ۇكىمەت ءبىرقاتار الەۋمەتتىك ماڭىزى بار جوبالاردى قارجىلاندىرۋ تۋرالى شەشىم قابىلداعان بولاتىن. ولاردىڭ قاتارىندا زەرەندى اۋىلىندا (اقمولا وبلىسى) سپورت كەشەنى، تەمىرلان اۋىلىندا (تۇركىستان وبلىسى) مۋزىكا مەكتەبى، ارقالىقتا دارىندى سپورتشى بالالارعا ارنالعان سپورت ورتالىعى، استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى، الماتىدا ەرەكشە قاجەتتىلىكتەرى بار ادامدارعا ارنالعان جاتتىعۋ ورتالىعى، اقتوبەدە ەرەكشە بالالارعا ارنالعان ارنايى بالاباقشا، جامانسور اۋىلىندا (اتىراۋ وبلىسى) مەكتەپ، ريددەردەگى كوپسالالى اۋرۋحانا قۇرىلىسىن اياقتاۋ، سونداي-اق شىمكەنتتە «سايرام كومەكشى مەكتەپ-ينتەرنات-كوللەدجى» كەشەنىندەگى جاتاقحانا قۇرىلىسى سەكىلدى جوبالار بار.