قۇب اتىنان دەپ تارالىپ جاتقان جالعان اقپاراتقا سەنبەۋگە شاقىرادى.
ۇلتتىق بانكتىڭ فيرمالىق بلانكىن پايدالانىپ، ازاماتتارعا جالعان قۇجات جولداۋشى الاياقتاردىڭ كوبەيگەن، دەپ حابارلايدى aqshamnews.kz
بۇل تۋرالى ۇلتتىق بانك مالىمدەمە تاراتتى.
باس بانك مالىمدەۋىنشە، قاسكويلەر ۇلتتىق بانك اتىنان جىبەرگەن جالعان حاتتاردا الاياقتاردىڭ قۇربانى بولعانىن حابارلايدى. ءسويتىپ، الاياقتاردان اقشانى ءقاۋىپسىز تۇردە قايتارۋ ءۇشىن جانە «كليرينگ پروسەدۋراسىنان وتۋگە بايلانىستى قارجى مىندەتتەمەلەرىن» وتەۋ ءۇشىن اقشا اۋدارۋ كەرەك ەكەنىن ايتادى.
«قۇب جەكە تۇلعالاردىڭ شوتىنا قىزمەت كورسەتپەيتىنىن، قارجى قۇرالدارىن ساقتاندىرمايتىنىن جانە حالىقپەن اقشالاي ەسەپ ايىرىسپايتىنىن ەسكە سالامىز. ينتەرنەت الاياقتارى مۇنداي حابارلامالاردى WhatsApp ءموبيلدى قوسىمشاسى، ەلەكتروندىق پوشتا جانە الەۋمەتتىك جەلىلەر ارقىلى تاراتادى»، – دەپ جازىلعان رەسمي حابارلامادا.
وسىعان بايلانىستى ۇلتتىق بانك ازاماتتاردى ساق بولۋعا، كۇماندى شوتتارعا اقشا اۋدارماۋعا، جالعان حابارلامالار مەن تەكسەرىلمەگەن قۇجاتتارعا سەنبەۋگە شاقىرادى.
سونداي-اق، مۇنداي سحەمالاردى الاياقتار قۇقىق قورعاۋ ورگاندارى نەمەسە ۇلتتىق بانك قىزمەتكەرلەرىنىڭ اتىن جامىلىپ جۇزەگە اسىرۋى مۇمكىن ەكەنىن ەسكە سالادى. ولار مۇنى «اۋدارىمداردى الاياقتاردان ساقتاندىرۋ پروسەدۋراسى»، قارجى ۇيىمدارىنداعى «الاياقتاردى ۇستاۋ»، «ارنايى ورگانداردىڭ تەكسەرۋى» نەمەسە مەملەكەتتىك ورگانداردىڭ بىرلەسكەن «ارنايى وپەراسيالارىنا» قاتىسۋ سياقتى ءتۇرلى جالعان پروسەسس رەتىندە ءتۇسىندىرىپ، الداپ سوعۋى ىقتيمال.
سوندىقتان، ءوزىڭىز نەمەسە تانىسىڭىز وسىنداي الاياقتىق سحەماعا تاپ بولىپ جاتساڭىز، ارىز جازىپ، قۇقىق قورعاۋ ورگاندارىنا جۇگىنۋ جولدارىن ۇسىنادى. كەڭەس الۋ ءۇشىن قۇب-تىڭ بايلانىس ورتالىعىنا 1477 ءنومىرى ارقىلى حابارلاسۋعا بولادى.