تاراز قالاسىندا قوعامدىق ءتارتىپ پەن قاۋىپسىزدىكتى قامتاماسىز ەتىپ جۇرگەن 5513 اسكەري ءبولىمىنىڭ اسكەري جاساعى قىزمەتتىك مىندەتىن اتقارۋ بارىسىندا جول شەتىندە جەردە جاتقان قىمبات ماركالى ۇيالى تەلەفوندى بايقاپ قالادى. تابىلعان زات تۋرالى ولار دەرەۋ اسكەري جاساق كەزەكشىسىنە حابارلايدى.
از ۋاقىتتان كەيىن تەلەفونعا قوڭىراۋ تۇسكەن. قوڭىراۋ سوعۋشى – ۇيالى تەلەفونىن جوعالتىپ العان جاس تۇرعىن ەكەن. جوعالعان زاتىن ىزدەپ كەلگەن بوزبالانىڭ شىنىمەن دە تەلەفون يەسى ەكەنىنە كوز جەتكىزگەننەن كەيىن، اسكەري جاساق ونى ۋچاسكەلىك پوليسيا پۋنكتىنە جەتكىزىپ، قاجەتتى قۇجاتتاردى رەسمي تۇردە راسىمدەپ، تەلەفوندى يەسىنە قايتاردى. اسكەري جاساق قۇرامىندا توپ باستىعى قاتارداعى ۆياچەسلاۆ كيم جانە پاترۋلدەۋشى سارباز قاتارداعى الەكساندر وستاپەنكو بولدى. توپ جەتەكشىسى وزدەرىنە جۇكتەلگەن مىندەتتىڭ ماڭىزىن اتاپ ءوتتى:
-ۇلتتىق ۇلان ساربازى ءۇشىن ەڭ باستىسى – ءتارتىپ پەن ادالدىق. ءبىز تابىلعان زاتتى يەسىنە قايتارۋ ارقىلى ءوزىمىزدىڭ ازامات الدىنداعى جاۋاپكەرشىلىگىمىزدى كورسەتتىك. ءبىز قىزمەتتە وتە قىراعى ءارى ادال بولۋىمىز كەرەك، – دەدى قاتارداعى ۆياچەسلاۆ كيم.
تەلەفون يەسى ۇلاندىق ساربازدارعا شىنايى العىسىن ءبىلدىرىپ، ولاردىڭ ادال قىزمەتىنە ريزاشىلىعىن جەتكىزدى.
قىراعىلىق پەن ادىلدىك – ۇلتتىق ۇلان جاۋىنگەرىنىڭ باستى قارۋى. مۇنداي يگى ىستەر اسكەري قىزمەتشىلەردىڭ ەل الدىنداعى ادال مىندەتىن تاعى ءبىر دالەلدەي ءتۇستى.
ق ر ءىىم ۇلتتىق ۇلانى