ۇلتتىق قۇرىلتايدىڭ كەزەكتى وتىرىسىندا ۇلتتىق يدەولوگيا جانە جاستاردى تاربيەلەۋ ماسەلەلەرىن قاراۋ جوسپارلانعان. بۇل جايىندا ءماجىلىس دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«ۇكىمەت وتانسۇيگىشتىك قۇندىلىقتارىن قالىپتاستىرۋ، قازاقستاندىق بىرەگەيلىكتى دامىتۋ بويىنشا كەشەندى جۇمىستار جۇرگىزۋدە. بىرىنشىدەن، قازاقستان رەسپۋبليكاسى مادەني ساياساتىنىڭ 2023-2029 جىلدارعا ارنالعان تۇجىرىمداماسى قابىلداندى. تۇجىرىمدامادا وتباسىلىق، ءداستۇرلى، ۇلتتىق جانە قوعامدىق قۇندىلىقتاردىڭ ءوزارا ءىس-قيمىلىنا نەگىزدەلگەن وسكەلەڭ ۇرپاقتى مادەني ادامگەرشىلىككە تاربيەلەۋدىڭ جاڭا تەتىكتەرىن ەنگىزۋ ماسەلەلەرى قاراستىرىلعان. ول ءداستۇرلى قۇندىلىقتاردى قولداۋ، قوعامدىق سانانى جاڭعىرتۋعا، ۇلتتىڭ مادەني كودىن رۋحاني جاڭعىرتۋعا جانە نىعايتۋعا ىقپال ەتەتىن ادامگەرشىلىك باعدارلاردى قالىپتاستىرۋ جانە ءتىلدى دامىتۋ، مادەني-تاريحي قۇندىلىقتار مەن داستۇرلەردى ساقتاۋ ارقىلى جۇزەگە اساتىن بولادى. وسىعان قوسا، وسكەلەڭ ۇرپاقتى رۋحاني دامىتۋ جانە پاتريوتتىق سەزىمى مەن ءداستۇرلى قۇندىلىقتارعا دەگەن قۇرمەتىن تاربيەلەۋ مىندەتتەرىنە قول جەتكىزۋ ءۇشىن بالالاردىڭ ەلدەگى تەاترلار مەن مۋزەيلەرگە اي سايىن بارۋىن كوزدەيتىن «تەاترداعى كۇن» جانە «مۋزەيدەگى كۇن» جوبالارى جۇزەگە اسىرىلاتىن بولادى»، - دەپ اتاپ وتەدى ۇكىمەت باسشىسى جاۋابىندا.
ونىڭ اتاپ وتۋىنشە، ەكىنشىدەن، 2023-2029 جىلدارعا ارنالعان مەملەكەتتىك جاستار ساياساتى تۇجىرىمداماسى بەكىتىلدى. وندا جاستار اراسىنداعى زاماناۋي قۇندىلىقتار جانە پاتريوتتىق تاربيەگە باعىتتالعان ارنايى ءبولىم بار. اتاپ ايتقاندا، ۇلتتىق قۇندىلىقتاردى جاستار اراسىندا ناسيحاتتاۋ، ازاماتتىق بەلسەندىلىكتى، پاتريوتتىق تاربيەنى، سالاۋاتتى ءومىر سالتىن، مادەنيەت جانە ءبىلىم بەرۋدى دامىتۋعا باستى نازار اۋدارىلعان. ۇشىنشىدەن، مەملەكەت پەن قوعامنىڭ ودان ءارى دامۋىنا ىقپال ەتەتىن، حالىقتىڭ مۇددەلەرىنە ساي كەلەتىن يدەيالىق-قۇندىلىق باعدارلارىن ايقىندايتىن قازاقستان رەسپۋبليكاسىنىڭ اقپاراتتىق دوكتريناسى بەكىتىلدى.
«دوكترينادا قابىلدانىپ جاتقان ءىس-شارالار وتاندىق اقپاراتتىق ءونىمنىڭ باسەكەگە قابىلەتتىلىگىن ارتتىرۋعا ىقپال ەتەدى، سونداي-اق اقپاراتتىق ءورىستىڭ يدەولوگيالىق باعىتتارىندا ۇلتتىق قۇندىلىقتاردىڭ ۇستەمدىگىن قامتاماسىز ەتەدى. وسىعان قوسا، قوعامدىق بىرىگۋدى ودان ءارى دامىتۋ جونىندەگى يدەيالار مەن قادامداردى تۇجىرىمدايتىن قازاقستان رەسپۋبليكاسى پرەزيدەنت جانىنداعى ۇلتتىق قۇرىلتاي قىزمەت اتقارادى. ۇلتتىق قۇرىلتايدىڭ كەزەكتى وتىرىسىندا ۇلتتىق يدەولوگيا جانە جاستاردى تاربيەلەۋ ماسەلەلەرىن قاراۋ جوسپارلانعان. جالپى بۇگىنگى تاڭدا قولدانىستاعى تۇجىرىمدامالار مەن باعدارلامالاردا قازاقستاندىق بىرەگەيلىكتى، ۇلتتىق يدەولوگيالىق قۇندىلىقتاردى دارىپتەيتىن باعىتتار قاراستىرىلعان»، - دەدى ءاليحان سمايىلوۆ.