بيىل تۇركىستاندا وتكەن ۇلتتىق قۇرىلتايدا كوتەرىلگەن ماسەلە حاقىندا سەناتور نۇرتورە ءجۇسىپ Almaty-akshamy.kz تىلشىسىنە ءوز ويىن بولىسكەن ەدى.
ۇلتتىق قۇرىلتايدا كوپتەگەن ۇلتتىق، مەملەكەتتىك، الەۋمەتتىك ماسەلەلەر قوزعالدى. جاڭا عاسىرداعى قازاق ەلىنىڭ كەلەشەگىنە قاتىستى ءبىرقاتار ناقتى باستاما كوتەرىلدى. پرەزيدەنت قاسىم-جومارت توقايەۆ القالى جيىندا تالاي اتالى ءسوزدى ايتا كەلىپ،”سونىمەن بىرگە بالالارعا ەكولوگيالىق تاربيە بەرۋ ماڭىزدى. ولاردى تابيعاتقا جاناشىرلىقپەن قاراۋعا ۇيرەتكەن ءجون. مادەني مۇرالارىمىزدى تانىپ-بىلۋگە، قورعاۋعا داعدىلاندىرۋ كەرەك. وقۋشىلار تەاترعا، مۇراجايعا جانە تاريحي ورىندارعا ءجيى بارىپ، رۋحاني جاعىنان دامۋى قاجەت" دەگەن وي ايتتى. مۇنىڭ ءبارى ەل تاعدىرى ءۇشىن وتە وزەكتى ماسەلەلەر دەپ ەسەپتەيمىن.
سونىمەن قاتار ءىرى قالالاردى سۋمەن، جىلۋمەن قامتۋ پروبلەماسىن العا تارتتى.
“وسى تۇيتكىل – اكىمدەردىڭ جۇمىسىنداعى ناعىز ولقىلىق. ونى تەز ارادا تۇزەتۋ كەرەك. اكىمدەردىڭ قولىنان كەلمەسە، ءتيىستى شەشىمدەردى قابىلدايمىن”،-دەپ ماسەلەنى توتەسىنەن قويدى.
شىنىندا ءقازىر استانا مەن الماتى قالاسىنداعى سۋ تاپشىلىعى وتە كۇردەلى ماسەلە. ەكى مەگاپوليستە تۇرعىن ۇيلەر قيساپسىز سالىنىپ جاتىر. سونىڭ سالدارىنان سۋمەن جابدىقتاۋ ىسىندە ۇلكەن پروبلەما تۋىنداپ وتىر. استانادا ءبىرقاتار شاعىن اۋداندار سۋسىز قالدى. الماتىنىڭ مەدەۋ اۋدانىندا دا كۇردەلى احۋال پايدا بولدى.
قازاقستان ءۇشىن سۋ پروبلەماسى جىلدان جىلعا كۇشەيە بەرمەك. وسىنداي جاعدايدا قالا اكىمدىكتەرى شۇعىل ارەكەت ەتۋى ءتيىس. قوسىمشا سۋ كوزدەرىن تابۋ، ولاردى سۋ ۇنەمدەيتىن جاڭا تەحنولوگيالار ارقىلى ءتيىمدى پايدالانۋ باستى ماقسات بولۋى ءتيىس. وكىنىشكە قاراي تۇرعىندار تاراپىنان سۋدى ۇنەمدى جانە دۇرىس پايدالانۋ تالاپتارى ساقتالا بەرمەيدى.
الماتى قالاسى تاۋلى ايماقتا ورنالاسقاننان كەيىن جاۋىن-شاشىن كوپ بولادى. قالا كوشەلەرىنەن، قالانى كوكتەي وتەتىن ىرىلى-كىشىلى وزەندەر مەن بۇلاقتاردىڭ، جاڭبىر سۋىن ارنايى توسپا جاساپ، سۋ رەزەرۆۋارلارىنا جيىپ، تەحنيكالىق سۋ ەسەبىندە پايدالانۋ جاعى مۇلدەم ەسكەرىلمەگەن. عالىمدار مەن جاڭا تەحنولوگيانى يگەرگەن مامانداردى وسى ىسكە تارتۋعا نە كەدەرگى؟
ەكولوگيالىق مادەنيەتتى قالىپتاستىرۋ دا وزەكتى ماسەلە.
قازاقستاندى ءار ازامات “بۇل مەنىڭ تۋعان جەرىم، اتامەكەنىم! سوندىقتان ونى كوزدىڭ قاراشىعىنداي ساقتاۋىم كەرەك” دەگەن تۇسىنىكتى جاس ۇرپاقتىڭ ساناسىنا مىقتاپ ءسىڭدىرۋ قاجەت.
ۇلتتىق قۇرىلتايدا ۇلتتىق يدەولوگياعا قاتىستى ارنالى ۇسىنىستار جاسالعان بولاتىن. پارلامەنت پالاتالارىنىڭ بىرلەسكەن وتىرىسىندا وسى ۇسىنىستاردى “بەكزات قوعام” دەگەن ۇلتتىق جوباعا اينالدىرىپ، قارجىلاندىرۋ ماسەلەسىن كەشەندى تۇردە شەشىپ، مەملەكەت باسشىسىنىڭ وي-ۇسىنىستارىن جەدەل جۇزەگە اسىرۋدى ۇسىنعان ەدىم.
ۇلتتىق قۇرىلتاي - حالىقتىڭ ارمان-اڭسارىن توعىستىرعان مارتەبەلى جيىن. پرەزيدەنتىمىز سول جيىنداردا ەڭ وزەكتى دەگەن ۇلتتىق ماسەلەلەردى قوزعاپ، ناقتى ۇسىنىستار جاساپ كەلەدى. بۇل ۇسىنىستار حالىقتىڭ دىتتەگەن جەرىنەن، جۇرەك كوڭىلىنەن شىقتى. ەندى سونىڭ ءبارىن كەشەندى سيپاتتا جۇزەگە اسىرۋدىڭ جايىنا كىرىسكەن ابزال!