ۇلتتىق كىتاپ كۇنىنە وراي الماتىدا رەسپۋبليكالىق جاستار كونۆەنتى ءوتتى. ءىس-شارانى الماتى كىتاپحانالارى «عىلىم ورداسى» جانە قازاقستان رەسپۋبليكاسىنىڭ ۇلتتىق كىتاپحاناسىنىڭ قولداۋىمەن ۇيىمداستىردى.
كونۆەنت اياسىندا ەلىمىزدىڭ ءار وڭىرىنەن كەلگەن 42 جاس مامان باستامالارىن ۇسىنىپ، كىتاپحانا سالاسىنداعى زاماناۋي سىن-قاتەرلەر مەن بولاشاعىن تالقىلادى.
ءىس-شارانىڭ ماڭىزدى بولىگىنىڭ ءبىرى – وڭىرلىك كىتاپحاناشىلارعا ارنالعان پراكتيكۋم بولدى. ونى ا.پ. چەحوۆ اتىنداعى ورتالىق قالالىق كىتاپحانا، س. بەگالين اتىنداعى بالالار كىتاپحاناسى جانە «عىلىم ورداسى» ماماندارى جۇرگىزدى. قاتىسۋشىلار اۆتوماتتاندىرىلعان كىتاپحانالىق اقپاراتتىق جۇيەمەن (اقاج) جۇمىس ىستەۋدى ۇيرەنىپ، كىتاپ قورىن سيفرلاندىرۋ ۇدەرىسىمەن تانىستى، سونداي-اق، باسپا ونىمدەرىن قالپىنا كەلتىرۋ تەحنولوگياسىن مەڭگەردى. بۇل تاجىريبە الماتى كىتاپحانالارىنىڭ ءساتتى جاڭعىرتىلۋ ۇلگىسى رەتىندە باسقا وڭىرلەرگە دە تارالۋى مۇمكىن.
ءىس-شارا سوڭىندا ءوزىن-وزى باسقارۋ جۇيەسىمەن جۇمىس ىستەيتىن اۆتونومدى كىتاپحانا تانىستىرىلدى. بۇل ءداستۇرلى كىتاپحانا قىزمەتىنە دەگەن كوزقاراستى وزگەرتەتىن يننوۆاسيالىق فورمات.