2025 جىلعى شىلدەدە قازاقستان 39 ەلدىڭ قاتارىندا بۇۇ-نىڭ نيۋ-يوركتەگى شتاب-پاتەرىندە وتەتىن ورنىقتى دامۋ جونىندەگى جوعارى دەڭگەيدەگى ساياسي فورۋمدا ءۇشىنشى ەرىكتى ۇلتتىق شولۋدى تانىستىرادى. فورۋم - ءتۇرلى ەل بۇۇ-نىڭ 2030 جىلعا دەيىنگى كۇن ءتارتىبىن ىسكە اسىرۋ تاجىريبەسىمەن جانە جەتىستىگىمەن بولىسەتىن باستى حالىقارالىق الاڭنىڭ ءبىرى.
شولۋ جۇمىسىن ۇلتتىق ەكونوميكا مينيسترلىگى مەملەكەتتىك ورگاندارمەن، ازاماتتىق قوعاممەن، بيزنەسپەن جانە حالىقارالىق ارىپتەستەرمەن بىرلەسىپ جۇرگىزۋدە. ورنىقتى دامۋ ماقساتتارى جونىندەگى ۇيلەستىرۋ كەڭەسى پروسەستىڭ دايىندىق جوسپارىن بەكىتتى.
شولۋدىڭ جوباسى بۇۇدب مەن ەكونوميكالىق زەرتتەۋلەر ينستيتۋتىنىڭ قولداۋىمەن وتكىزىلگەن وڭىرلىك سەمينارلاردا تالقىلاندى. ديالوگقا بارلىق نەگىزگى توپتار، سونىڭ ىشىندە جاستار وكىلدەرى قاتىستى.
سونىمەن قاتار، ەلىمىزدە ورنىقتى دامۋ ماقساتتارىن مەملەكەتتىك جوسپارلاۋ جۇيەسىنە ينتەگراسيالاۋ جالعاسۋدا. 2024 جىلعى قازاندا ۇلتتىق ينديكاتورلاردىڭ جاڭارتىلعان تىزبەسى بەكىتىلىپ، 200 كورسەتكىشتىڭ 69-ى باسىم باعىت رەتىندە بەلگىلەندى. بۇگىنگى تاڭدا ولاردىڭ 93%-ى مەملەكەتتىك جوسپارلاۋ جۇيەسىنىڭ قۇجاتتارىندا ەسكەرىلىپ، ال وڭىرلەردە وبلىستاردىڭ دامۋ جوسپارىنا تولىقتاي ەنگىزىلگەن.
وسىلايشا، قازاقستان تۇراقتى جانە ينكليۋزيۆتى وسۋگە قول جەتكىزۋگە، مەملەكەتتىك باسقارۋ ساپاسىن جاقسارتۋعا جانە حالىقارالىق ارەناداعى ءوز ۇستانىمىن نىعايتۋعا دايەكتى تۇردە كوشۋدە.
بۇل قازاقستاننىڭ بۇۇ شەڭبەرىندە ۇسىناتىن ءۇشىنشى شولۋى. وسىنداي ەسەپتەر 2019 جانە 2022 جىلدارى ءساتتى تانىستىرىلىپ، حالىقارالىق ارىپتەستەر تاراپىنان جوعارى باعالانعان ەدى. 2025 جىلعى فورۋمعا قاتىسۋ ەلىمىزدىڭ جاھاندىق كۇن تارتىبىنە نيەتتەستىگىن ايقىنداپ، حالىقارالىق قوعامداستىقپەن ىنتىماقتاستىعىن كۇشەيتەدى.
انىقتاما: ەرىكتى ۇلتتىق شولۋ كۇن ءتارتىبى-2030 قابىلدانعان ساتتەن باستاپ، ەلىمىزدىڭ ورنىقتى دامۋ ماقساتتارىنا قول جەتكىزۋدەگى ىلگەرىلەۋىن كورسەتەدى. بۇل تاجىريبە الماسۋعا، مەملەكەتتىك ينستيتۋتتى نىعايتۋعا، جاھاندىق مىندەتتەردى جۇزەگە اسىرۋعا ارىپتەستەردى كەڭىنەن تارتۋعا ىقپال ەتەدى.