ۇلتتىق بانك جەلتوقسان ايىنداعى ۆاليۋتالىق نارىقتىڭ نەگىزگى كورسەتكىشتەرىن جاريالادى. اي سوڭىندا تەڭگە باعامى 2،5%-عا تومەندەدى، ال قور بيرجاسىنداعى ساۋدا كولەمى ازداپ قىسقارعان، دەپ حابارلايدى aqshamnews.kz
2024 جىلدىڭ جەلتوقسان ايىنىڭ قورىتىندىسى بويىنشا تەڭگە باعامى 2،5%-عا السىرەپ، 1 اقش دوللارى 525،10 تەڭگەنى قۇرادى. قازاقستان قور بيرجاسىنداعى (KASE) كۇندەلىكتى ساۋدا كولەمى ءبىر ايدا 262 ملن دوللاردان 254 ملن دوللارعا تومەندەدى. جەلتوقسانداعى جالپى ساۋدا كولەمى 5،3 ملرد دوللاردى قۇرادى.
ۇلتتىق بانك مالىمەتىنشە، تەڭگە ديناميكاسى قىسقا مەرزىمدى كەزەڭدە كەلەسى فاكتورلارعا تاۋەلدى بولادى:
- نارىق قاتىسۋشىلارىنىڭ كۇتۋلەرى؛
- توقساندىق سالىق تولەمدەرى؛
- الەمدىك نارىقتاعى جاعدايلار؛
- گەوساياسي احۋالدىڭ وزگەرۋى.
ۇلتتىق بانك يكەمدى باعام بەلگىلەۋ رەجيمىن ۇستاناتىنىن اتاپ ءوتتى. بۇل ءتاسىل تەڭگەرىمسىزدىكتەردىڭ جيناقتالۋىن بولدىرماي، التىن-ۆاليۋتا رەزەرۆتەرىن ساقتاۋعا مۇمكىندىك بەرەدى.
2024 جىلدىڭ سوڭىندا ءبىرىڭعاي جيناقتاۋشى زەينەتاقى قورىنىڭ (ەنپف) ۆاليۋتالىق اكتيۆتەرى جالپى پورتفەلدىڭ 40%-دان استامىن قۇرايدى. جەلتوقسان ايىندا ۇلتتىق بانك زەينەتاقى اكتيۆتەرىنىڭ ينۆەستيسيالىق پورتفەلىنە دوللار ساتىپ العان جوق جانە 2025 جىلدىڭ قاڭتار ايىندا دا ساتىپ الۋ جوسپارلانبايدى.
جەلتوقسان ايىندا ىشكى ۆاليۋتالىق نارىقتا شەتەل ۆاليۋتاسىنا دەگەن سۇرانىس جوعارى بولىپ، ۇسىنىس شەكتەۋلى بولدى. بۇل جاعدايدى تۇراقتاندىرۋ ءۇشىن ۇلتتىق بانك ۆاليۋتا ينتەرۆەنسيالارىن جۇرگىزدى. ينتەرۆەنسيالار كولەمى 307،6 ملن دوللاردى قۇرادى.
ۇلتتىق بانك ۆاليۋتالىق نارىقتاعى جاعدايدى باقىلاۋدا ۇستاپ، تەڭگە باعامىنىڭ تۇراقتىلىعىن قامتاماسىز ەتۋگە باعىتتالعان شارالاردى جالعاستىراتىنىن مالىمدەدى.