ۇلتتىق بانك جەكە تۇلعالارعا قىزمەت كورسەتپەيدى جانە حالىقپەن اقشالاي ەسەپ ايىرىسپايدى، دەپ حابارلايدى Almaty-akshamy.kz قارجى ۇيىمىنا سىلتەمە جاساپ.
ۇلتتىق بانك تەلەفون الاياقتارىنىڭ ءوز «وكىلەتتىگىن» نەمەسە جوق شوتتارى مەن اۋدارىمدارىن راستاۋ ءۇشىن جالعان قۇجات ۇسىنۋ فاكتىلەرى جيىلەپ جاتقانىن مالىمدەدى.
«ەسكەرتەمىز: الاياقتار ءوزىن ۇلتتىق بانك قىزمەتكەرى رەتىندە تانىستىرىپ، ق ر ازاماتتارىنىڭ قاراجاتىن جىمقىرۋ ماقساتىندا جاڭىلىستىرۋعا تىرىسادى. سونىمەن قاتار، بۇل سحەمالار «ارنايى وپەراسيا» دەگەن جەلەۋمەن «قۇقىق قورعاۋ ورگانى قىزمەتكەرلەرىنىڭ قاتىسۋىمەن» جۇزەگە اسىرىلىپ جاتقانداي بولادى. سول ىس-ارەكەتىنىڭ زاڭدىلىعىن راستاماق بولىپ «ۇلتتىق بانكتىڭ قىزمەتكەرىنە» قوڭىراۋ شالادى، قىزمەتكەردىڭ جالعان كۋالىگىن ۇسىنىپ، بانكتىك اۋدارىمدار ءۇشىن دەرەكتەر جىبەرەدى»، - دەپ جازدى ۆەدومستۆودان.
مۇنداي قۇجاتتار، كوبىنە، ازاماتتىڭ نەسيەلىك قارىزىن وتەۋ ءۇشىن ازاماتتار اۋدارعان قاراجاتى بار بانكتە شوتى نەمەسە سەيفتىك ۇياشىعى بارىن راستايتىن اقپاراتتى قامتيدى. بۇدان باسقا، قۇجاتتا «ۋاكىلەتتى تۇلعالاردىڭ» قويعان قولى، ءاتى-جونى، ءمورى جانە باسقا دا راستايتىن ەلەمەنتتەر كورسەتىلەدى.
«بانكتىك وپەراسيالاردى راستايتىن جالعان قۇجاتتاردى نەمەسە جالعان سۋرەتى بار كۋالىكتەردى پايدالانعانى – ازاماتتاردىڭ سەنىمىن وياتادى جانە الاياقتارعا قوماقتى سومانى اۋدارۋعا ماجبۇرلەيدى.
وسىعان بايلانىستى ۇلتتىق بانك «قۇقىق قورعاۋ جۇيەسى قىزمەتكەرلەرىنەن» نەمەسە «ۇلتتىق بانك قىزمەتكەرىنەن» تەلەفون ارقىلى قوڭىراۋ تۇسكەندە اڭگىمەنى ءۇزىپ، الاياقتىق ماقساتتا ويلاستىرىلعان «ارنايى وپەراسيالاردى» جۇرگىزۋگە قاتىسپاۋ كەرەك ەكەنىن جەتكىزەدى. بۇدان ءارى 1477 ءنومىرى بويىنشا ۇلتتىق بانكتىڭ بايلانىس ورتالىعىنا نەمەسە قۇقىق قورعاۋ ورگاندارىنا جۇگىنۋگە بولادى»، - دەلىنگەن حابارلامادا.
ۇلتتىق بانك ءموبيلدى قوسىمشالاردى ورناتپاۋدى، ءوزىنىڭ دەربەس دەرەكتەرىن جاريالاماۋدى، ۇيالى تەلەفوندى قاشىقتان باسقارتپاۋدى جانە تەلەفونمەن اڭگىمە كەزىندە الىنعان نۇسقاۋلار بويىنشا قاراجاتتى ءۇشىنشى تۇلعانىڭ شوتىنا اۋدارماۋدى سۇرايدى.
ۇلتتىق بانك جەكە تۇلعالارعا قىزمەت كورسەتپەيتىنىنە جانە حالىقپەن اقشالاي ەسەپ ايىرىسپايتىنىنا نازار اۋدارامىز. ۇلتتىق بانكتىڭ قىزمەتىمەن nationalbank.kz رەسمي سايتىندا تانىسۋعا بولادى.