اباي (يبراھيم) قۇنانباي ۇلىنىڭ تۋعان كۇنىنە وراي، ياعني 175 جىلدىق مەرەيتويى قارساڭىندا 2020 جىلدىڭ 4 تامىزى كۇنى قازاقستان رەسپۋبليكاسى ۇكىمەتىنىڭ قاۋلىسىمەن 10 تامىز «اباي كۇنى» بولىپ بەلگىلەنگەن ەدى. وسىناۋ مەرەكە قارساڭىندا جەتىسۋ اۋدانىنداعى كوميۋنيتي-ورتالىعىندا «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ الماتى قالاسى، جەتىسۋ اۋداندىق فيليالى مەن «امانات» پارتياسىنىڭ جەتىسۋ اۋداندىق فيليالىنىڭ ۇيىمداستىرۋىمەن «ابايدىڭ ءسوزى – قازاقتىڭ بويتۇمارى» اتتى ادەبي ءىس-شارا ءوتتى.
ۇلى اباي كۇنى اياسىندا قازاقتىڭ ءسالت-داستۇرىن، قاستەرلى ۇلتتىق قۇندىلىقتارىن ناسيحاتتاپ، ۇلت بولاشاعىنا الاڭداعان اق كيمەشەكتى انالار باس قوسىپ، قوعامداعى جاس ۇرپاق تاربيەسىنە قاتىستى وزەكتى ماسەلەلەردى ورتاعا سالدى. جاس ۇرپاققا تاربيە بەرۋدىڭ العىشارتى ابايدىڭ دانالىق قارا سوزدەرى ەكەنىن ورتاعا سالىپ، وي ءبولىستى.
العاشقى ءسوز كەزەگىن جەتىسۋ اۋدانى ارداگەرلەر كەڭەسىنىڭ ءتورايىمى، قالالىق «اجەلەر كەڭەسىنىڭ» ءتورايىمى تامارا مۇحتارحان قىزى الدى.
– ءبىز ءۇشىن قازىرگى ۋاقىت وتە كۇردەلى. جاھاندانۋ اتتى بۇرىن-سوڭدى بولماعان وتپەلى كەزەڭدى كەشىپ جاتىرمىز. ءبىز وسىناۋ قيىن دا، جاۋاپتى كەزەڭدە ءوز قۇندىلىعىمىزدى ساقتاپ قالۋىمىز كەرەك. بۇل رەتتە «تەك اقىل، عىلىم، ەرىك، ار-ۇجدان ادامدى كوتەرەدى» دەگەن دانالىق ويدىڭ يەسى، قازاق حالقىنىڭ ۇلى اقىنى، ۇلت رۋحانياتىنىڭ تەمىرقازىعى اباي بابامىزعا ارقا سۇيەپ، قارا سوزىنە جۇگىنسەك بولدى دەر ەدىم. ءقازىر ۇلى ابايدى تەك قازاق حالقى عانا ەمەس، الەم تۇگەل ونىڭ دانالىق قارا سوزدەرىنەن ءنار الىپ جاتىر. شەتەلدەردە بوي كوتەرىپ جاتقان اباي ەسكەرتكىشتەرى تەككە قويىلىپ جاتقان جوق. ابايدىڭ باستاۋ العان تاربيە بۇلاعى – اجەسى، اتا-اناسى، وسكەن ورتاسى بولدى. بالاعا اكە – قامقور، اسقار تاۋ، سۇيەنىش، دەمەۋشى بولسا، انا – مەيىرىمى مول تاربيەشىسى، ومىردەگى دۇرىس ۇستانىم بولمىسىنىڭ ۇلكەن سەبەپكەرلەرى بولادى، – دەي كەلە، اكەسى مۇحتارحان باتىرحانوۆتىڭ ابايعا ارناعان ولەڭدەرىن وقىپ بەردى.
كەلەسى كەزەكتە «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ الماتى قالاسى جانە الماتى وبلىسى فيليالىنىڭ ءتورايىمى لايلە نوعاي قىزى ءسوز الىپ، ابايدىڭ «قارا سوزدەرى» ارقىلى ەڭبەك پەن بىلىمگە، ىزگىلىك پەن پاراساتقا قول جەتكىزۋگە بولاتىنىن ايتىپ، ادامنىڭ رۋحاني دامۋى مەن سانانىڭ جاڭعىرۋى جولىندا اباي شىعارمالارى باعا جەتپەس بايلىق بولىپ قالاتىنىنا توقتالدى.
كەش بارىسىندا استەرحان شويىنباي قىزى، بوتان بەكەتباي قىزى باستاعان انالار اباي قۇنانباي ۇلىنىڭ ادەبي جانە مۋزىكالىق شىعارمالارىنداعى وزەكتى گۋمانيستىك جانە اعارتۋشىلىق مۇراتتارعا يە پروگرەسسيۆتى كوزقاراستارى تۋرالى ويلارىن ورتاعا سالدى. ۇلى دانىشپاننىڭ «كوزىمنىڭ قاراسى»، «ايتتىم سالەم، قالامقاس» اتتى اندەرىن شىرقاعان انالار ءىس-شارانى ۇيىمداستىرعان «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ الماتى قالاسى، جەتىسۋ اۋدانى فيليال ءتورايىمى – گۇلجازيرا دۇيسەنقىزىنا، جەتىسۋ اۋدانى «امانات» پارتياسى يدەولوگيا ءبولىمىنىڭ مامانى – نۇرگۇل كەرىمقىزىنا العىستارىن ءبىلدىردى. وسىلايشا «قازاق انالارى – داستۇرگە جول» رەسپۋبليكالىق قوعامدىق بىرلەستىگىنىڭ اق كيمەشەك كيگەن انالارى ۇلى ابايدى ۇلىقتاپ، ءار سوزىنەن مارجان تەرىپ، اسەرلى ءانىن شىرقاپ كوڭىلدى تارقاستى.
