ارينە، قازاقستان رەسپۋبليكاسىنىڭ «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭى قۇرىلىس كەزەڭىندە پاتەر ساتىپ الاتىن ازاماتتاردىڭ قۇقىقتارىن قورعايدى. ۇلەستىك قۇرىلىسقا قاتىسۋ تۇرعىنداردىڭ تۇرمىس جاعدايىن جاقسارتۋ مۇمكىندىگىنە دە، باس اۋرۋىنا دا اينالۋى مۇمكىن. سوندىقتان اسىعىس شەشىم قابىلداماي، «ساقتانعاندى ساقتايدى» دەگەندى ۇمىتپاعان ابزال. سوندىقتان ۇلەستىك قاتىسۋ تۋرالى شەشىم قابىلداماس بۇرىن، بولاشاق كەلىسىمشارتتىڭ بارلىق مالىمەتتەرىن زەردەلەۋ قاجەت، دەپ حابارلايدى اlmaty-akshamy.kz
الماتى قالاسى قالالىق جوسپارلاۋ جانە ۋربانيستيكا باسقارماسىنىڭ ماماندارى الدىمەن قۇرىلىس كومپانياسىن اسا مۇقيات زەرتتەۋ جاساۋ كەرەكتىگىن العا تارتادى. زەرتتەۋدىڭ العاشقى قادامىن قۇرىلىس سالۋشى تۋرالى اقپارات جيناۋدان باستاڭىز. كوپ پاتەرلى تۇرعىن ۇيلەردى (كپتۇ) قايدا جانە قانشالىقتى ساپالى تۇرعىزدى، قۇرىلىستى سالۋ مەرزىمىن قانشالىقتى ساقتاعانىنا باسا نازار اۋدارعانىڭىز ءجون. مىندەتتى تۇردە شارشى مەتردىڭ باعاسىن انىقتاڭىز. ۇسىنىلعان باعانىڭ قالاداعى تۇرعىن ءۇيدىڭ شارشى مەترىنىڭ ورتاشا نارىقتىق قۇنىنان ەداۋىر تومەن بولۋى بايىپتى زەرتتەۋدى قاجەت ەتەدى. پاتەرلەردى ساتۋ جونىندەگى ۋاكىلەتتى كومپانيانىڭ جارعىلىق كاپيتالىنا ءجۇز پايىز قاتىسۋ ارقىلى مەنشىكتى جانە (نەمەسە) تارتىلعان اقشا ەسەبىنەن كوپ پاتەرلى تۇرعىن ۇيلەردىڭ تۇرعىن ءۇي قۇرىلىسىنا ۇلەستىك قاتىسۋدى ۇيىمداستىرۋ جونىندەگى قىزمەتتى جۇزەگە اسىراتىن زاڭدى تۇلعا عانا قۇرىلىس سالۋشى بولا الاتىنىن ەستە ساقتاڭىز. ۋاكىلەتتى كومپانيادا مەملەكەت بەرگەن ۋاقىتشا وتەۋلى جەر پايدالانۋ (جالداۋ) قۇقىعىمەن نەمەسە مەنشىك قۇقىعىمەن تيەسىلى جەر ۋچاسكەسى جانە كەشەندى ۆەدومستۆودان تىس ساراپتامانىڭ وڭ قورىتىندىسىمەن كوپپاتەرلى تۇرعىن ءۇي قۇرىلىسى جوباسىنىڭ جوبالاۋ-سمەتالىق قۇجاتتاماسى بولۋى مىندەتتى.
زاڭدى نەمەسە جەكە تۇلعالار تۇرعىن ءۇي قۇرىلىسىنا ۇلەستىك قاتىسۋ ءۇشىن شارت جاساسۋ ماقساتىندا كومپانيادان اقپارات تالاپ ەتكەن جاعدايدا ۋاكىلەتتى كومپانيا مەملەكەتتىك جانە ورىس تىلدەرىندە اقپارات بەرۋگە مىندەتتى:
- قۇرىلىس سالۋشىنىڭ جانە ۋاكىلەتتى كومپانيانىڭ اتاۋى مەن زاڭدى مەكەنجايى تۋرالى؛
- مەملەكەتتىك تىركەۋدى (قايتا تىركەۋدى) راستايتىن انىقتامانى؛
- كەپىلدىك شارتىنىڭ بولۋى تۋرالى، ءبىرىڭعاي وپەراتورمەن جاساسقان جانە ءبىرىڭعاي وپەراتوردان كەپىلدىك الۋ ارقىلى تۇرعىن ءۇي قۇرىلىسىنا ۇلەستىك قاتىسۋدى ۇيىمداستىرۋ جاعدايىندا ونىڭ نەگىزگى شارتتارى؛
- ەكىنشى دەڭگەيدەگى بانك جوباسىنا قاتىسۋ ارقىلى تۇرعىن ءۇي قۇرىلىسىنا ۇلەستىك قاتىسۋدى ۇيىمداستىرعان جاعدايدا ۇلەسكەرلەردەن اقشا تارتۋعا جەرگىلىكتى اتقارۋشى ورگاننىڭ رۇقساتىنىڭ بولۋى نەمەسە كوپپاتەرلى ءۇيدىڭ قاڭقاسى سالىنعاننان كەيىن ۇلەسكەرلەردىڭ اقشاسىن تارتۋ ءتاسىلى تۋرالى؛
-قۇرىلىس سالۋشى وتكىزگەن كوپ پاتەرلى تۇرعىن ۇيلەر قۇرىلىسى جوبالارى تۋرالى؛
- قۇرىلىسى بولجاناتىن كوپ پاتەرلى تۇرعىن ءۇي قۇرىلىسى وبەكتىسى تۋرالى؛
- ۋاكىلەتتى كومپانيانىڭ جەر ۋچاسكەسىنە ءتيىستى قۇقىعىن راستايتىن قۇجاتتىڭ بولۋى تۋرالى؛
مۇنداي قۇجاتتاردى زەرتتەۋ ءۇشىن ارنايى ءبىلىمى بولماسا، وسى سالادا تاجىريبەسى بار مامانداردى تارتقان دۇرىس. قۇرىلىس سالۋشىنى تاڭداۋ ماڭىزدى ماسەلە ەكەنىن ەستە ۇستاعان ءجون، ويتكەنى ول سىزگە پاتەردى بەرۋگە جاۋاپتى بولادى.
مۇنى مۇقيات زەرتتەپ، كومپانيا تۋرالى تولىق اقپاراتقا قانىق بولعاننان كەيىن ەكىنشى قادام – ۇلەسكەرلىك قۇرىلىسقا كەلىسىمشارت جاساۋعا بولادى.
تۇرعىن ءۇي قۇرىلىسىنا ۇلەستىك قاتىسۋ تۋرالى شارت جازباشا تۇردە جاسالادى جانە شارت قازاقستان رەسپۋبليكاسىنىڭ «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭىنىڭ 12-بابىندا كوزدەلگەن تارتىپپەن كوپ پاتەرلى تۇرعىن ءۇيدىڭ ورنالاسقان جەرىندەگى جەرگىلىكتى اتقارۋشى ورگاندا ەسەپكە قويعان كەزدەن باستاپ جاسالعان بولىپ ەسەپتەلەدى. تۇرعىن ءۇي قۇرىلىسىنا ۇلەستىك قاتىسۋ تۋرالى شارتتىڭ ۇلگىلىك نىسانى قازاقستان رەسپۋبليكاسى ۇلتتىق ەكونوميكا ءمينيسترىنىڭ بۇيرىعىمەن بەكىتىلگەن.
تۇرعىن ءۇي قۇرىلىسىنا ۇلەستىك قاتىسۋ تۋرالى شارت تۇرعىن ءۇي قۇرىلىسىنا ۇلەستىك قاتىسۋدىڭ ءبىرىڭعاي اقپاراتتىق جۇيەسىن پايدالانا وتىرىپ، ۋاكىلەتتى كومپانيانىڭ ۇسىنۋىمەن كپتۇ ورنالاسقان جەرى بويىنشا جەرگىلىكتى اتقارۋشى ورگاندا ەسەپكە الىنۋعا ءتيىس.
شارت EGOV.KZ پورتالىندا ەسەپكە قويىلعاننان كەيىن عانا قۇرىلىس سالۋشى (ۋاكىلەتتى كومپانيا) سىزدەن اقشا الۋعا قۇقىلى.
قۇرىلىس سالۋشىلار ۇلەستىك قۇرىلىسقا قاتىسۋ شارتىن جاساسۋدىڭ ورنىنا كەلەسى زاڭسىز ارەكەتتەرگە باراتىن جاعدايلار بارىپ جاتادى. كەيبىر قۇرىلىس سالۋشى ءتيىستى زاڭدى قۇجاتتارىنىڭ ورنىنا ينۆەستيسيالاۋ شارتى؛ بىرلەسكەن قىزمەت تۋرالى شارت؛ ۇلەستىك قۇرىلىسقا قاتىسۋعا الدىن الا جاسالعان كەلىسىمشارتى؛ ءالى سالىنباعان (بولاشاقتا سالىناتىن) جىلجىمايتىن مۇلىكتىڭ الدىن الا جاسالعان ساتۋ-ساتىپ الۋ كەلىسىمشارتى؛ جوعارىدا اتالعان كەلىسىمشارتتار بويىنشا قويىلاتىن تالاپتار قۇقىقتارىنا جول بەرۋ جونىندەگى كەلىسىمدەر؛ پاتەردى برونداۋ نەمەسە برونداۋ شارتى جانە ت.ب. سەكىلدى قۇجاتتاردى كورسەتەدى.
ەگەر قۇرىلىس سالۋشى ۇلەستىك قاتىسۋ شارتىنان باسقا قانداي دا ءبىر شارت جاساسۋدى ۇسىنسا، مۇنداي قۇقىقتىق قاتىناستار زاڭسىز بولىپ سانالاتىنىن جانە زاڭ تالاپتارىن بۇزا وتىرىپ جاسالعان بارلىق مامىلەلەر جارامسىز دەپ تانىلاتىنىن ەستە ساقتاعانىڭىز ءجون.
باسقارما ماماندارى زاڭ اياسىندا تۇرعىن ءۇي ساتىپ الۋ عانا ءسىزدىڭ قۇقىقتارىڭىز بەن مۇددەلەرىڭىزدى قورعاۋعا كەپىلدىك بەرەتىنىن ەسكە سالادى.
ۇلەسكەرلەردەن اقشا تارتۋعا رۇقساتى بار تۇرعىن ءۇي كەشەندەرىنىڭ ءتىزىمىن مىنا سىلتەمە ارقىلى كورۋگە بولادى:
https://www.gov.kz/memleket/entities/almaty-uaig/about؟lang=ru جانە https://almaty.uaig.kz/
تۇرعىن ءۇي قۇرىلىسىنا ۇلەستىك قاتىسۋ تۋرالى تولىق اقپاراتتى:
https://www.gov.kz/memleket/entities/almaty-uaig/activities/directions؟lang=ru جانە https://almaty.uaig.kz/
تۇرعىن ءۇي قۇرىلىسىنا ۇلەستىك قاتىسۋ، سونداي-اق «سۇر سحەما بويىنشا» پاتەرلەردى ساتۋ فاكتىلەرى بويىنشا سۇراقتارىڭىزدى: 8-727-240-80-00، ىشكى: 221 تەلەفونى ارقىلى بىلە الاسىز. سونىمەن قاتار، uaigkz@mail.ru ەلەكتروندى پوشتاسى ارقىلى جولداساڭىز بولادى.
الماتى قالاسى قالالىق جوسپارلاۋ جانە ۋربانيستيكا باسقارماسى