اقپان ايىنىڭ 23–26 جۇلدىزىندا م.اۋەزوۆ اتىنداعى قازاق ۇلتتىق دراما تەاترىندا «پرەمەرالار اپتالىعى» ۇيىمداستىرىلدى. 4 كۇنگە سوزىلعان شارادا جاس رەجيسسەرلاردىڭ شىعارماشىلىق ەڭبەگى كوپتىڭ كوڭىلىنەن شىعىپ، لايىقتى باعالاندى.
ءىس-شارادا قازاقستان رەسپۋبليكاسىنىڭ مادەنيەت جانە سپورت ءمينيسترى داۋرەن ابايەۆ باستاعان قوناقتار قاتارىندا ەلىمىزدىڭ مادەنيەت جانە ونەر سالاسىنىڭ بەلدى وكىلدەرى، تەاتر باسشىلارى، بىرنەشە ونەر ۇجىمى بوي كورسەتتى. ق ر مادەنيەت جانە سپورت مينيسترلىگى اتىنان ىقىلاس گ ۇلى جولداندى. سونىمەن قاتار، تەاتر ۇجىمىن ءساتتى پرەمەراسىنىڭ وتۋىنە وراي الماتى قالاسىنىڭ اكىمدىگى دە ىقىلاس گۇلىمەن قۇتتىقتادى.
«الاتاۋدىڭ بوكتەرىندە، تەاترىمىزدىڭ تورىندە ۇيىمداستىرىلىپ جاتقان ءىس-شاراعا قازاقستاننىڭ تۇكپىر-تۇكپىرىنەن تەاتر ونەرىنىڭ مايتالماندارى جينالدى. كورەرمەن نازارىنا ۇسىنىلعان تىڭ دۇنيەلەردىڭ اۆتورى، رەجيسسەرلارى، اكتەرلارى – جاستار. «بولاشاق – جاستاردىڭ قولىندا» دەمەكشى، جاڭا تولقىنعا سەنىم ءبىلدىرىپ، ەڭبەكتەرىن باعالاپ جاتقان جايىمىز بار»، – دەيدى م.اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك.
«پرەمەرالار اپتالىعىنىڭ» شىمىلدىعىن اشقان «قان مەن تەر. اقبالا» سپەكتاكلى جوعارى دەڭگەيدە ءوتتى. «ءبىزدىڭ تراكتوۆكامىزدا بۇل ماحاببات ۇشتىگىنە، ادامنىڭ ىشكى قۇندىلىعىنا، ادامنىڭ، جالپى قوعامنىڭ ادام ومىرىنە دەگەن قارىم-قاتىناسىنا قۇرىلعان. سوعان بايلانىستى وسى سپەكتاكلىمىزدى قويىپ وتىرمىز»، – دەدى «قان مەن تەر. اقبالا» سپەكتاكلىنىڭ رەجيسسەرى ءاريداش وسپانبايەۆا. سپەكتاكلدەگى باستى كەيىپكەرلەردىڭ ءبىرى - اقبالانى سومداعان اكتريسا بۇل رولگە بەكىتىلگەنىنە قۋانعانىن، الايدا ىشتەي قوبالجىعانىن جاسىرمادى. «ءبىر قىزىعى، مەن بۇل تەاتردا قانشا ءرول سومداسام، سونىڭ بارلىعى كوبىنە شەتەلدىك شىعارمالار بولىپ كەلەدى. ال بۇل – مەن سومداعان ءۇشىنشى قازاق قىزىنىڭ وبرازى»، – دەدى اكتريسا، «قۇرمەت» وردەنىنىڭ يەگەرى نازگۇل قارابالينا.
اپتالىقتىڭ ەكىنشى كۇنى كورەرمەندەر نازارىنا «قىتايدان جەتكەن سالەمدەمە» دراماسى ۇسىنىلدى. قويىلىم سوناۋ كەڭەس زامانى ورناپ، قازاق-قىتاي شەكاراسى قايتا شەگەلەنگەن ۋاقىتتاردى باياندايدى. جۇرەگىنىڭ بولشەگى شەكارانىڭ ارعى بەتىندە قالىپ قوي̆عان، ساعىنىشتان قۇسا بولعان ادامداردىڭ استاڭ-كەستەڭ جان-دۇنيەسىن تەاتر ۇجىمى شەبەر جەتكىزە ءبىلدى. «بۇل – دراماتۋرگياعا العاش قادام باستىرعان شىعارما. ءبىزدى قولداپ، جاستىعىمىزعا قاراماي دەمەۋ بىلدىرگەن تەاتر ۇجىمىنا العىسىمىزدى بىلدىرەمىز»، – دەيدى دراماتۋرگ جاقسىلىق مۇراتبەك.
ۇلكەن ساحنالارعا لايىقتى ەكى بىردەي مونودراما ءبىر كەشتە كىشى زالدا كورەرمەن قاۋىمعا ۇسىنىلدى. جانسايا باۋىرجان قىزىنىڭ «قايداسىڭ، ماما؟»، ا.باتىر قىزىنىڭ «بەيتانىس-تانىستار» مونوسپەكتاكلى جۇرەكتى ەلجىرەتتى. تاعدىر اعىنى بىردە سىرتقا تەپسە، بىردە باۋىرىنا تارتادى، بىردە لاپىلداعان توزاق-جالىن بولىپ قامالاسا، كەيدە ءبىرتوعا، بۇيىعى سەزىمگە اينالىپ، تىعىرىققا تىرەيدى، دىبىسسىز ىشقىندىرادى. وسىنداي ساتتەردە ادام بالاسىنىڭ قاسىنان تابىلاتىن انا ەكەندىگىن قويىلىم ايقىنداي ءتۇستى. «قويىلىمنان ەرەكشە اسەر الىپ قايتتىم. اراسىندا كوزىمە جاس تا كەلدى. جاستاردىڭ ەڭبەگىنە ءتانتى بولدىم. اتا-انامدى ساعىنىپ، اۋىلعا كەتكىم كەلىپ كەتتى. سارانىڭ ءرولىن سومداعان زاۋرە كوپجاساروۆاعا ەرەكشە العىسىمدى بىلدىرەمىن»، – دەيدى كورەرمەن اسەل رۋزيباي قىزى.
ەكىنشى سپەكتاكل ايەل ادامنىڭ كوڭىل-كۇيىنىڭ قۇبىلمالى تۇستارىن، بىردە كوكتەم، بىردە كۇز بولاتىنىن ايشىقتاي تۇسەدى. سىزدەردى ايەل اتتى سيمفونيانى تىڭداپ، ونىڭ تاعدىر قۇپياسىن بىرگە اشۋعا شاقىرامىز. «ايەل ادامنىڭ مۇڭى مەن زارى دا وتكىنشى جاۋىن ىسپەتتەس، ءقازىر توپەپ قۇيىپ بەرگەنمەن، ىلە-شالا جادىراپ شىعا كەلەدى. بۇل – ونىڭ ءبىر كەلبەتى. تاعى ءبىر سيپاتى – ءتۇپسىز تەرەڭ تۇڭعيىق، سيقىرلى دا سىرلى الەم. ول جاقتىڭ ساپ-سارى سازى دا، قوڭىر اۋەن بوياۋى دا وزگەشە»، – دەيدى بەيتانىس جاننىڭ ءرولىن سومداعان اكتريسا بايان قاجىنابييەۆا.
ەرەكشە ءبىر ايتا كەتەتىن جايت، سپەكتاكلدە جالعىز اكتريسا ءتورت ايەلدىڭ وبرازىن سومدايدى.
پرەمەرالار اپتالىعى دۋلات يسابەكوۆتىڭ «ماقشار تۇنگى ماحاببات» ميستيكالىق دراماسىمەن اياقتالدى. شىعارما قازاق دالاسىنا كەلگەن قىزىل توڭكەرىلىستىڭ كوشپەندىلەردى عاسىرلار بويى قالىپتاسقان ۇيرەنشىكتى دامۋ ىرعاعىنان جاڭىلدىرعانىن، ءبىراز جۇرتتىڭ شەكارا اسىپ، اتامەكەنىن تاستاسا، ەندى ءبىرازى جاڭا وكىمەتتىڭ سويىلىن سوققانىن بەينەلەدى. سونداي-اق، قوعامداعى ءماجبۇرلى وزگەرىس ادامي قۇندىلىقتارعا سالقىنىن تيگىزگەنىن كورەرمەنگە جەتكىزدى.