ۋكرايناداعى قازاقستان ازاماتتارىن پولشا ارقىلى ەلگە الدىرۋ ءۇشىن 3 رەيس ۇيىمداستىرىلادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ۋكرايناداعى احۋال «قاۋىپسىزدىكتىڭ جوعارى تاۋەكەلى بار» دەپ باعالانعانىنا جانە ۋكراينا اۋە كەڭىستىگىنىڭ جابىلۋىنا بايلانىستى، «ەير استانا» اۋە كومپانياسى 2022 جىلعى 24 اقپاننان 7 ناۋرىزعا دەيىن ۋكرايناعا قاتىنايتىن بارلىق تۇراقتى رەيستەردى توقتاتتى.
بۇعان دەيىن «ەير استانا» قازاقستان مەن ۋكراينا اراسىندا جولاۋشىلار تاسىمالىن الماتى – كييەۆ (اپتاسىنا 3 رەيس)، نۇر-سۇلتان – كييەۆ (اپتاسىنا 1 رەيس) باعىتتارى بويىنشا اتقاراتىن. قازاقستان ازاماتتارىن ەلگە اكەلۋ ءۇشىن ق ر يندۋستريا جانە ينفراقۇرىلىمدىق دامۋ مينيسترلىگى ق ر سىرتقى ىستەر مينيسترلىگىمەن، ق ر ۋكراينا مەن پولشاداعى ەلشىلىكتەرىمەن، سونداي-اق «ەير استانا» اۋە كومپانياسىمەن بىرلەسىپ، كاتوۆيسە (پولشا) - اتىراۋ باعىتى بويىنشا رەپاترياسيالىق رەيستەردى ۇيىمداستىرۋ ماسەلەسىن پىسىقتادى. ق ر سىرتقى ىستەر مينيسترلىگىنىڭ اقپاراتى بويىنشا، رەپاترياسيالىق رەيستەردى ۇيىمداستىرۋعا ارنالعان شىعىندار مەملەكەت ەسەبىنەن وتەلەدى»، - دەپ جازىلعان «ەير استانا» اق باسپا ءسوز قىزمەتى مالىمەتىندە.
«ەير استانا» وسى كەلىسىم اياسىندا ا-321 ۇلگىسىندەگى، سىيىمدىلىعى 179 ورىندىق اۋە كەمەسىمەن 3 رەيس ورىنداۋدى جوسپارلاپ وتىر. ولار: 1) 28 اقپان پولشا ۋاقىتىمەن: اتىراۋ (08:45) – كاتوۆيسە (09:00/10:30) – اتىراۋ (19:20)؛ ال نۇر-سۇلتان ۋاقىتىمەن: اتىراۋ (09:45) – كاتوۆيسە (14:00/15:30) – اتىراۋ (20:20). 2) 28 اقپان پولشا ۋاقىتىمەن: اتىراۋ (14:00) – كاتوۆيسە (14:20/16:00) – اتىراۋ (00:20+1)، جەرگىلىكتى ۋاقىت. ال نۇر-سۇلتان ۋاقىتىمەن: اتىراۋ (15:00) – كاتوۆيسە (19:00/20:30) – اتىراۋ (21:20)، نۇر-سۇلتان قالاسىنىڭ ۋاقىتىمەن.
«ءۇشىنشى رەيستىڭ كەستەسى قوسىمشا حابارلانادى. ق ر پولشاداعى كونسۋلىنىڭ اقپاراتىنا سۇيەنسەك، 28 اقپان كۇنى ساعات 08:00-دەگى جاعداي بويىنشا، كاتوۆيسە قالاسىندا قازاقستاننىڭ 80 ازاماتى (49 جولاۋشى جانە ق ر ۋكرايناداعى ەلشىلىگىنىڭ 31 قىزمەتكەرى) بار. سونداي-اق، بۇگىن 116 قازاقستاندىق ازامات ۋكراينا-پولشا شەكاراسىنان ءوتىپ، قازىرگى ۋاقىتتا كاتوۆيسە اۋەجايىنا بەت الدى. ق ر ازاماتتارىنىڭ كاتوۆيسە قالاسىنا كەلۋ ۋاقىتى جەرگىلىكتى ۋاقىت بويىنشا ساعات شامامەن 07:00 دەپ بەلگىلەنگەن»، - دەلىنگەن «ەير استانا» ۇسىنعان اقپاراتتا.
قازاقستان رەسپۋبليكاسىنىڭ پولشاداعى كونسۋلىنىڭ اۋە كومپانياسىنا بەرگەن اقپاراتى بويىنشا، 1ء-شى رەيسپەن ق ر ازاماتتارىن (116+49 ادام) تاسىمالداۋ جوسپارلانۋدا. ق ر ۋكرايناداعى ەلشىلىگىنىڭ قىزمەتكەرلەرى (31 ادام) 2ء-شى رەيسپەن ۇشۋدى جوسپارلاپ وتىر. «سونىمەن قاتار، مىناداي پروبلەمالار بار: 1) اۆتوموبيلدەردىڭ كوپ جينالۋىنا بايلانىستى كييەۆ قالاسىنان شىعۋ قيىن؛ 2) ۋكراينا مەن پولشا شەكاراسىندا ادامداردىڭ ءنوپىرى قالىڭ (شەكارادان كاتوۆيسەگە دەيىنگى قاشىقتىق شامامەن 400 شاقىرىم)»، - دەپ جازىلعان مالىمەتتە.