قازاقستاننىڭ اۋە كەڭىستىگىمەن وتەتىن ترانزيتتىك ۇشاقتار سانى ارتتى

سوڭعى تاۋلىكتە 257 رەيس ورىندالدى.

ەلىمىزدىڭ اەروناۆيگاسيالىق جۇيەسى ەشقانداي شەكتەۋلەرسىز اۋە قوزعالىسىن قابىلداي الادى، دەپ حابارلايدى Almaty-akshamy.kz.

«اۋە كەڭىستىكتەرىنىڭ جابىلۋىنا بايلانىستى ەۋروپادان وڭتۇستىك-شىعىس ازيا، ءۇندىستان جانە پارسى شىعاناعى ەلدەرىنە باعىتتالعان ترانزيتتىك رەيستەردىڭ كوپشىلىگى ءقازىر ەۋروپانىڭ وڭتۇستىك دالىزدەرى ارقىلى ورىندالۋدا. بۇل رەتتە اۋە قوزعالىسى اعىنىنىڭ ءبىر بولىگى قارا تەڭىز وڭىرىنەن قازاقستان اۋماعىنا باعىتتالدى. سوڭعى تاۋلىكتە ەلدىڭ اۋە كەڭىستىگى ارقىلى بۇرىن جوسپارلانباعان 257 رەيس ورىندالدى»، - دەلىنگەن يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا

رەسپۋبليكانىڭ اەروناۆيگاسيالىق جۇيەسىنىڭ وتكىزۋ قابىلەتى ەشقانداي شەكتەۋسىز اۋە قوزعالىسىنىڭ قوسىمشا كولەمىن قابىلداۋعا مۇمكىندىك بەرەتىنىن اتاپ وتكەن ءجون.

سونداي-اق، اۋە قوزعالىسىن ۇيىمداستىرۋ بويىنشا ءبىرقاتار ارنايى شارالار قاراستىرىلعان: قوسىمشا سەكتورلار اشۋ، كەزەكشى اۋىسىمداردى كۇشەيتۋ جانە ازاماتتىق-اسكەري ۇيلەستىرۋدىڭ ءوزارا ءىس-قيمىلى، تۇزەتىلگەن جانە بالاما باعىتتار ۇسىنۋ، قازاقستاننىڭ اۋەايلاقتارىنا قوناتىن كەمەلەر ءۇشىن اۋە كەڭىستىگىن پايدالانۋعا رۇقسات بەرۋدى وڭايلاتۋ جانە ت. ب.

ەۋروپادان قىتايعا جانە وڭتۇستىك-شىعىس ازياعا باعىتتالعان رەيستەردىڭ ارتۋى ەلىمىزگە ايىنا $1،5 ملن كولەمىندە قوسىمشا تابىس اكەلەدى.