ۇكىمەتتە قۇرىلىس سالاسىنا قاتىستى زاڭعا ەنگىزىلەتىن تۇزەتۋلەر قارالدى

تۇزەتۋلەر پاكەتى دايىندالعان

ق ر پرەمەر-مينيسترى ءاليحان سمايىلوۆ قۇرىلىس سالاسىن رەفورمالاۋ جانە ونىڭ باسەكەگە قابىلەتتىلىگىن ارتتىرۋ ماسەلەلەرى جونىندە كەڭەس وتكىزدى، دەپ حابارلايدى Almaty-akshamy.kz ۇكىمەت باسشىسىنىڭ باسپا ءسوز قىزمەتىنە سىلتەمە جاساپ.
بايانداما جاساعان يندۋستريا جانە ينفراقۇرىلىمدىق دامۋ ۆيسە-مينيسترى ەركەبۇلان داۋىلبايەۆ قۇرىلىس سالاسىنىڭ تيىمدىلىگىن ارتتىرۋ تەتىكتەرىن ازىرلەۋ قورىتىندىلارى بويىنشا زاڭنامالىق تۇزەتۋلەر پاكەتى دايىندالعانىن اتاپ ءوتتى.
جاڭا نورمالاردى ەنگىزۋدىڭ ارقاسىندا شاعىن جانە ورتا بيزنەستىڭ مەملەكەتتىك ساتىپ الۋعا قاتىسۋ مۇمكىندىكتەرىن كەڭەيتۋ، زاڭسىز جانە ءونىمسىز قوسالقى مەردىگەرلەردىڭ، سونداي-اق بىلىكتىلىگى جوق ليسەنزياتتاردىڭ قىزمەتىن شەكتەۋ جوسپارلانىپ وتىر.
بۇدان باسقا، نارىق سۋبەكتىلەرىنە جەر ۋچاسكەلەرىن الۋ كەزىندە تەڭ مۇمكىندىكتەر بەرۋ، ۇلەستىك قۇرىلىس سالاسىن جەتىلدىرۋ جانە سالا بويىنشا لايىقتى ەڭبەكاقى تولەۋدى قامتاماسىز ەتۋ جوسپاردا بار.
زاڭنامالىق تۇزەتۋلەردى قابىلداۋ قۇرىلىس كولەمىن بىركەلكى بولۋگە، ورىندالاتىن جۇمىستاردىڭ ساپاسى مەن اشىقتىعىن ارتتىرۋعا مۇمكىندىك بەرەدى دەپ كۇتىلەدى.
پرەمەر-مينيستر ۇسىنىلعان وزگەرىستەردىڭ نەگىزگى بولىگىن قولدادى جانە مۇددەلى مەملەكەتتىك ورگاندارعا ەگجەي-تەگجەيلى ەسەپ جاساۋدى قاجەت ەتەتىن تارماقتاردى قوسىمشا پىسىقتاۋدى تاپسىردى.