جاڭا كەزەڭ باستاۋى
قازاقستان مەن ءازىربايجان اراسىندا ديپلوماتيالىق قارىم-قاتىناس ورناعانىنا 30 جىل تولىپ وتىر، دەپ حابارلايدى Almaty-akshamy.kz قازاقپارات-قا سىلتەمە جاساپ.
وسىدان تۋرا 30 جىل بۇرىن، دالىرەك ايتساق، 1992 جىلدىڭ 27 تامىزدا قازاقستان مەن ءازىربايجان اراسىنداعى ديپلوماتيالىق قارىم-قاتىناس ورنىققان ەدى.
تاريحي ولشەممەن قاراعاندا بۇل قىسقا مەرزىم بولىپ كورىنۋى مۇمكىن. ءبىراق باۋىرلاس ەلدەردىڭ مەملەكەتارالىق قاتىناستارى ءدال وسى كەزەڭدە قالىپتاسىپ، نىعايدى.
2005 جىلى باكۋدە قول قويىلعان ستراتەگيالىق سەرىكتەستىك جانە وداقتاستىق قارىم-قاتىناس تۋرالى شارت ەكى ەلدىڭ ىنتىماعىن جاڭاكەزەڭگە شىعاردى.
باسقاشا ايتساق، ەكى ەلدىڭ دوستىعى مەن وداقتاس قاتىناستارى وسى قۇجاتتان تامىر الىپ جاتىر.
پوستكەڭەستىك اۋماقتاعى باۋىرلاس ەكى ەل ءبىر-بىرىنىڭ ەگەمەندىگى مەن اۋماقتىق تۇتاستىعىن سوزبەن عانا ەمەس، ناقتى ىس-ارەكەتپەن دە اشىق قولداپ كەلەدى.
كوپۆەكتورلى جانە تەڭگەرىمدى سىرتقى ساياسات قازىرگى زامانعى سىن-قاتەرلەردە، ونىڭ ىشىندە الەمدە سوڭعى ايلاردا بايقالعان گەوساياسي تۋربۋلەنتتىلىك جاعدايىندا ءوزىنىڭ مىزعىماستىعىن كورسەتتى.
بۇگىندە قازاقستان مەن ءازىربايجان اراسىندا ماقۇلدانعان ءتۇرلى سيپاتتاعى 90-عا جۋىق قۇجاتتاردىڭ بازاسى بار. ونىڭ ىشىندە مەملەكەتارالىق شارتتار، ۇكىمەتارالىق كەلىسىمدەر جانە وزگە دە قۇجاتتار بار.
ىنتىماقتاستىق فورماتىنا كەلسەك، ول كوپجاقتى بسيپاتقا يە. ال بۇۇ، ەقىۇ، يىۇ، اوسشك، تۇركسوي، وتگ سياقتى حالىقارالىق جانە وڭىرلىك ۇيىمداردىڭ بارىندە ەكى ەلدىڭ ارەكەتى ۇيلەسىم تاپقان.
سونىمەن قاتار، ەكى ەلدىڭ زاڭنامالىق ورگاندارى اراسىندا تىعىز ءوزارا ءىس-قيمىل جولعا قويىلعان. مەملەكەتتەر اراسىنداعى ەكىجاقتى بايلانىستاردىڭ نەگىزىنە ساياسي عانا ەمەس، ەكونوميكالىق قاتىناستار دا كىرەدى.
ءازىربايجان بۇگىندە قازاقستاننىڭ وڭتۇستىك كاۆكازداعى نەگىزگى ساۋدا-ەكونوميكالىق ارىپتەسى بولىپ ەسەپتەلەدى.