پرەمەر-مينيستر ولجاس بەكتەنوۆ وڭىردەگى شەنەۋنىكتەرگە ەسكەرتۋ جاسادى، - دەپ حابارلايدى اlmaty-akshamy.kz.
وعان سەبەپ – جىلىتۋ ماۋسىمىنا دايىندىقتىڭ تومەندىگى.
"ءقازىر – الداعى جىلىتۋ ماۋسىمىنا دايىندىقتىڭ ناعىز قىزعان شاعى. جازدىڭ ءبىرىنشى ايى دا اياقتالۋعا جاقىن. الايدا جىلۋ وبەكتىلەرىندەگى جوندەۋ مەرزىمدەرىنىڭ ساقتالماۋى الاڭداۋشىلىق تۋعىزىپ وتىر"، - دەدى ولجاس بەكتەنوۆ ۇكىمەت وتىرىسىندا.
پرەمەر-مينيستر ناقتى مىسالدار كەلتىردى:
- ەكىباستۇز جىلۋ ورتالىعىندا جوندەۋ جۇمىستارىن باستاۋ مەرزىمى مامىردان ماۋسىمنىڭ سوڭىنا اۋىستىرىلعان.
- تەمىرتاۋدا №2 جىلۋ ورتالىعىنداعى 2-قازاندىقتى جوندەۋ جۇمىستارى ساۋىردەن بەرى باستالماي تۇر. ونداعى تۋربينالاردى كۇردەلى جوندەۋ جۇمىستارى دا اياقسىز قالۋى مۇمكىن.
- 13 مامىردا باستالۋعا ءتيىس بولعان تارازدىڭ №4 جىلۋ-ەلەكتر ورتالىعىنداعى №1 تۋربينانى جوندەۋ جۇمىستارىنان دا ءالى كۇنگە ماردىمدى حابار جوق.
- جەزقازعانداعى جىلۋ-ەلەكتر ورتالىعىنىڭ №5 قازاندىعى ماۋسىمنان باستاپ قانا جوندەۋگە قويىلدى. جەكە جابدىقتى جوندەۋ جۇمىستارىن ءتىپتى جىل سوڭىندا اۋىستىرۋ جوسپارلانۋدا.
"ايتا بەرسەك، مۇنداي مىسالدار كوپ. ەلىمىزدىڭ بارلىق وڭىرىنەن كەلتىرۋگە بولادى. بيىل مامىردىڭ باسىندا ۇكىمەت وتىرىسىندا جوندەۋ مەرزىمدەرىن ۇزارتۋعا جانە ولاردىڭ كولەمىن ازايتۋعا بولمايتىنىن تاپسىرعانمىن. الايدا وپەراتور كەگوك بەكىتكەن جوندەۋ جۇمىستارىنىڭ كەستەسىن مەنشىك يەلەرى ءوز بەتىنشە وزگەرتۋىن دوعارماي وتىر.
بيىلدىڭ وزىندە عانا جوندەۋ جۇمىستارىن اۋىستىرۋ بويىنشا كەستەگە 18 رەت وزگەرىس ەنگىزىلگەن. وعان اكىمدىكتەر مەن ەنەرگەتيكا مينيسترلىگىنىڭ كەلىسىمى دە الىنباعان. ياعني اتالعان فاكتىلەر باقىلاۋدىڭ جەتكىلىكسىز ەكەنىن كورسەتىپ وتىر"، - دەدى ۇكىمەت باسشىسى.
وسىعان بايلانىستى ول وڭىردەگى شەنەۋنىكتەرگى ەسكەرتۋ جاساپ، ورىنباسارىنا تاپسىرما بەردى.
"سوندىقتان رومان سكليار مەنىڭ تاپسىرمام بويىنشا پروبلەماسى كوپ وبەكتىلەردى ارالاپ ءجۇر. تاياۋدا عانا قاراعاندى وبلىسىنا بارىپ كەلدى. رومان ۆاسيليەۆيچ، جالپى جەرگىلىكتى جەرلەردە شۇعىل شەشىمدەر مەن بارىنشا قاتاڭ شارالاردى قابىلداڭىز. جوندەۋ جۇمىستارىنىڭ ساپاسىنا ەرەكشە نازار اۋدارۋدى سۇرايمىن"، - دەدى ولجاس بەكتەنوۆ.
سونداي-اق پرەمەر-مينيستر جىلۋ جەلىلەرىن جاڭعىرتۋ قارقىنى دا تومەن ەكەنىن اتاپ ءوتتى.
"ازىرگە جوسپارلانعان جۇمىس كولەمىنىڭ 25 پايىزى دا ورىندالعان جوق. باسقا وڭىرلەرمەن سالىستىرعاندا اقمولا، اقتوبە، اتىراۋ جانە ماڭعىستاۋ وبلىستارىندا جىلۋ جەلىلەرىنىڭ دايىندىعى تومەن.
جىلۋ جەلىلەرىن جاڭعىرتۋ جۇمىستارى نەگىزىنەن رەسپۋبليكالىق بيۋدجەت قاراجاتى ەسەبىنەن عانا جۇرگىزىلىپ وتىرعانىن ايتا كەتۋ كەرەك. "ءتاريفتى ينۆەستيسياعا ايىرباستاۋ" باعدارلاماسىنىڭ مۇمكىندىگىن تولىق پايدالانباي وتىرمىز. جالپى جىلىتۋ ماۋسىمىنا دايىندىق جۇمىستارىنىڭ تيىمدىلىگى تومەن"، - دەپ ءسوزىن تۇيىندەدى ۇكىمەت باسشىسى.