قۇرمانعازى اتىنداعى قازاق ۇلتتىق حالىق اسپاپتار وركەسترى – قازاقستانداعى اسپاپتىق مۋزىكا ونەرى تاريحىنداعى العاشقى كاسىبي جانە بىرەگەي وركەستر.
ۇجىم بۇكىل الەمگە قازاقتىڭ مادەنيەتىن، كوركەم ونەرىن، تەڭدەسى جوق دالا سازى مەن ەرەكشە اسپاپتارىن تانىستىرىپ كەلەدى، دەپ حابارلايدى Almaty-akshamy.kz.
وركەستردى 1934 جىلى احمەت جۇبانوۆ قۇرعان. ءار جىلدارى ۇجىمدى دارىندى مۋزىكانتتار - شامعون قاجىعالييەۆ پەن نۇرعيسا تىلەندييەۆ باسقاردى. ولار جۇبانوۆتىڭ ءىسىن جالعاستىرىپ قانا قويماي، رەپەرتۋاردىڭ بايۋىنا ءوز ۇلەسىن قوستى.
1944 جىلى وركەسترگە قازاقتىڭ ۇلى كۇيشىسى قۇرمانعازى ساعىرباي ۇلىنىڭ ەسىمى بەرىلدى. وركەستر 1967 جىلى قازاقستاننىڭ ەڭبەك سىڭىرگەن ۇجىمى، 1978 جىلى اكادەميالىق وركەسترى اتاعىن يەلەندى. 1984 جىلى وركەستر «حالىقتار دوستىعى» وردەنىمەن ماراپاتتالدى، 2020 جىلى قازاقستان رەسپۋبليكاسى پرەزيدەنتىنىڭ جارلىعىمەن «ۇلتتىق» مارتەبە بەرىلدى.
بۇگىندە وركەستر ۇجىمىندا 135 ادام ەڭبەك ەتىپ جاتىر. ءبىر جىل ىشىندە وركەستر 100-دەن استام كونسەرت بەردى، كورەرمەن سانى 45000 ادامعا جەتتى. ال مۋزىكانتتاردىڭ رەپەرتۋارلىق قورى 5000-نان استام شىعارماعا دەيىن جەتەدى.
مەرەيتويعا وراي قازاقستاندا دا، شەتەلدە دە ءبىرقاتار ءىس-شارالار جوسپارلانىپ وتىر. مۋزىكالىق ۇجىم تۇرىكمەنستانعا بارىپ، اشحاباد كورەرمەندەرىنىڭ الدىندا ونەر كورسەتىپ، ولارعا قازاق حالىق مۋزىكاسىنىڭ مول مۇراسىمەن تانىستىرادى.
مەرەيتويلىق تۋر اياسىندا وركەستر قاراعاندى مەن قوستانايدا جارقىن ءارى ەستە قالارلىق شىعارمالارىن تارتۋ ەتەدى.
مەرەكەنىڭ قورىتىندى كەشىندە قازاق مۋزىكاسىنىڭ كلاسسيكالىق تۋىندىلارى مەن جاڭا كومپوزيسيالار ورىندالاتىن گالا-كونسەرت وتەدى.