بيىل ۇلتتىق ءبىرىڭعاي تەست تاپسىرۋ كەزىندە زاڭ بۇزعان 19 تالاپكەردىڭ ناتيجەسى جويىلدى، دەپ حابارلايدى almaty-akshamy.kz ۇلتتىق تەستىلەۋ ورتالىعىنا سىلتەمە جاساپ.
ورتالىق تاراتقان مالىمەتتەرگە قاراعاندا، ۇلتتىق تەستىلەۋ ورتالىعى تەستىلەۋدى تاپسىرۋ كەزىندە انىقتالعان زاڭ بۇزۋشىلىقتار جونىندە ۇنەمى حاباردار ەتىپ وتىرادى. بۇل جەردە بوگدە تۇلعالاردى انىقتاۋ، سونداي-اق تىيىم سالىنعان زاتتاردى الىپ كىرۋگە تالپىنۋ جانە ولاردى پايدالانۋ تۋرالى ايتىلىپ وتىر.
ەرەجە بۇزىلعان جاعدايدا، اقپارات اۆتوماتتى تۇردە ورتالىقتىڭ مينيسترلىكپەن كەلىسىمىنسىز ودان ءارى قاراۋ ءۇشىن قۇقىق قورعاۋ ورگاندارىنا تاپسىرىلادى. وسى رەتتە ۇتو وقۋعا تۇسۋشىلەردىڭ ءبىلىم العان مەكتەبى، ونىڭ ىشىندە ولاردىڭ اتا-انالارى تۋرالى مالىمەتتەردى انىقتامايدى.
بۇل - ۇبت وتكىزۋ ەرەجەلەرىنە وزگەرىستەر ەنگىزىلگەننەن كەيىن ەكى جىلدان بەرى جۇزەگە اسىرىلىپ كەلە جاتقان ماڭىزدى جۇمىس. ايتا كەتۋ كەرەك، وتكەن جىلى وسى نورمانى قابىلداپ، بەينەجازبالاردى العاش رەت قاراستىرعان سوڭ تاعايىندالىپ قويعان گرانتتاردىڭ كۇشى جارامسىز بولىپ تانىلدى. بيىل دا بەينەجازبالاردى تەكسەرگەننەن كەيىن 19 تالاپكەردىڭ ناتيجەسى جويىلدى.
«ۇبت اياقتالىپ، گرانتتار تاعايىندالعاننان كەيىن دە ۇلتتىق تەستىلەۋ ورتالىعىنىڭ قىزمەتكەرلەرى تالاپكەرلەردىڭ قاتىسۋىمەن بەينەجازبالاردى قارايدى. ءبىرىنشى كەزەكتە 100-دەن استام بالل جيناعان تەستىلەنۋشىلەردىڭ بەينەجازبالارى تەكسەرىلەدى. ءارى قاراي باسقا دا جاعدايلار قاراستىرىلادى. بۇل باعىتتاعى جۇمىس ودان ءارى جالعاساتىن بولادى»، - دەلىنگەن حابارلامادا.