فينليانديادا قازاقتىڭ جىلقىسى «جۇلدىز» اتاندى

سايگۇلىگىمىز شەت ەلدە تانىمال بولۋدا.

سىردىڭ بويىنان فينلياندياعا جەتكىزىلگەن سايگۇلىك جات جۇرتتا 8 جىل بويى باس بايگەنى بەرمەگەن. بۇل – وسىدان 29 جىل بۇرىن بولعان جاعداي، دەپ حابارلايدى Almaty-akshamy.kz. حابار 24 سايتىنا سىلتەمە جاساپ.

1992 جىلى الماتىدا دۇنيەجۇزى قازاقتارىنىڭ ءبىرىنشى قۇرىلتايى ءوتتى. وسىندا حالىق شارۋاشىلىعىنىڭ كورمەسى ءوتىپ، وندا جەر تارپىعان ارعىماق «انونس» فين ەلى پرەزيدەنتىنىڭ كوزىنە تۇسكەن ەكەن. ءسويتىپ، قوناعىن قۇدايىنداي سىيلاعان دارحان قازاق حالقىنىڭ اتىنان ەلباسىمىز الگى تۇلپاردى مارتەبەلى مەيمانعا سىيلايدى. ءقازىر حەلسينكي شاھارىندا ھاس تۇلپاردىڭ تاس ءمۇسىنى تۇر. فينليانديا پرەزيدەنتىنە «انونستى» جەتكىزگەن ەكەۋدىڭ ءبىرى – تىنىشتىقباي سىزدىقوۆ. بۇگىندە اقساقال سەكسەننىڭ سەڭگىرىنە شىققان. مىنا سۋرەتكە شيەلى اۋدانىنداعى مال دارىگەرى قىدىريا كۇلىبايەۆ پەن تىنىشتىقباي سىزدىقوۆتىڭ فينليانديانىڭ سول كەزدەگى مەملەكەت باسشىسى ماۋنا كويۆيستوعا ەلباسى اماناتىن تاپسىرىپ تۇرعان ءسات تۇسىرىلگەن.

«الايدا ءبىز مارتەبەلى قوناققا ۇناعان جىلقىنى ەمەس، سوعان ۇقسايتىن «زاسلون» اتتى كۇرەڭقاسقانى اپارىپ بەردىك. ونى «انونستىڭ» قۇجاتىمەن راسىمدەگەن بولاتىنبىز، – دەيدى قاريا. «ءبىراق ول شەتەلگە بارىپ «سۋجۇيرىككە اينالادى» دەگەن وي ءۇش ۇيىقتاساق تۇسىمىزگە كىرمەگەن»، – دەپ اعىنان جارىلدى تىنىشتىقباي سىزدىقوۆ.