تۇركسىب اۋدانىندا رەسپۋبليكا كۇنىنە وراي مەرەكەلىك ءىس-شارا ۇيىمداستىرىلدى. سالتاناتتى كونسەرتتى تاماشالاۋعا اۋدان تۇرعىندارى مەن قالا قوناقتارى كوپتەپ جينالدى. شارا باستالماي تۇرىپ مەملەكەتتىك تۋ سالتاناتتى تۇردە كىرگىزىلىپ، قازاقستان رەسپۋبليكاسىنىڭ ءانۇرانى ورىندالدى. بۇل ءسات جينالعان جۇرتقا ەرەكشە رۋح پەن پاتريوتتىق سەزىم سىيلادى.
ءىس-شارا بارىسىندا تۇركسىب اۋدانى اكىمىنىڭ ورىنباسارى ەرمەك ايتباي ۇلى قۇتتىقتاۋ ءسوز سويلەپ، جۇرتشىلىقتى مەرەكەمەن شىن جۇرەكتەن قۇتتىقتادى.
"قۇرمەتتى تۇرعىندار مەن قوناقتار! بارشاڭىزدى ەگەمەن ەلىمىزدىڭ تاۋەلسىزدىگىنە 35 جىل تولۋىنا وراي اتاپ وتىلەتىن رەسپۋبليكا كۇنىمەن شىن جۇرەكتەن قۇتتىقتايمىن. بۇل كۇن - ەلىمىزدىڭ ەڭ باستى مەرەكەلەرىنىڭ ءبىرى. ەلىمىز ماڭگىلىك بولىپ، تۋىمىز بيىكتە سامعاي بەرسىن!" -دەدى ول ءوز سوزىندە.
مەرەكەلىك شارا بارىسىندا اۋداننىڭ بەلسەندى ازاماتتارى مەن قوعامدىق ومىرگە ۇلەس قوسقان تۇرعىندارعا اۋدان اكىمىنىڭ العىس حاتتارى تابىستالدى. كونسەرتتىك باعدارلامادا پاتريوتتىق اندەر شىرقالىپ، بي جانە تەاترلاندىرىلعان كورىنىستەر قويىلدى. اسىرەسە ەلتاڭبا مەن ۇلتتىق رامىزدەردى قۇرمەتتەۋ تۋرالى قويىلىم كورەرمەنگە ەرەكشە اسەر قالدىردى.
"بۇگىنگى مەرەكەلىك شارا كوڭىلىمىزگە ەرەكشە قۋانىش سىيلادى. ءانۇران ورىندالىپ، تۋ كوتەرىلگەن ساتتە بويىمدى ماقتانىش سەزىمى كەرنەدى. وسىنداي ساتتەردە ءوز ەلىمنىڭ ازاماتى ەكەنىمە شىن مانىندە ريزا بولامىن. رەسپۋبليكا كۇنى - تاۋەلسىز ەلىمىزدىڭ تاريحىنداعى ەڭ ماڭىزدى مەرەكەلەردىڭ ءبىرى. بۇگىن كىشكەنتاي قىزىمدى دا ەرتىپ كەلدىم. وعان دا كىشكەنتايىنان ەلىن، جەرىن ءسۇيۋدى ۇيرەتكىم كەلەدى. بالالار وسىنداي مەرەكەلەردى كورىپ وسسە، جۇرەگىندە وتانعا دەگەن قۇرمەت پەن سۇيىسپەنشىلىك قالىپتاسادى دەپ سەنەمىن. مۇنداي شارالار حالىقتى بىرىكتىرىپ، ۇلتتىق رۋحتى كوتەرەدى. ەلىمىز امان بولىپ، وسىنداي مەرەكەلەر جىل سايىن كەڭ كولەمدە اتالىپ وتە بەرسىن!" - دەدى تۇركسىب اۋدانى تۇرعىنى اقزەر ورىنباسار.