الماتىداعى رەسپۋبليكا سارايىندا رەسپۋبليكا كۇنىنە ارنالعان سالتاناتتى كونسەرت ۇيىمداستىرىلدى. مەرەكەلىك كەشتىڭ شىمىلدىعى مەملەكەتتىك تۋدى ساحناعا اكەلىپ، قازاقستان رەسپۋبليكاسىنىڭ مەملەكەتتىك ءانۇرانىن حالىق ءارتيسى تالعات كۇزەمبايەۆتىڭ ورىنداۋىنان باستالدى.
ءىس-شاراعا الماتى قالاسىنىڭ اكىمى دارحان ساتىبالدى، قوعام جانە مادەنيەت قايراتكەرلەرى، ءماسليحات دەپۋتاتتارى، زيالى قاۋىم وكىلدەرى مەن جاستار قاتىستى.
كونسەرتكە رامازان ستامعازى، لۋينا، الىبەك دىنىشيەۆ، قازىبەك قۇرايىش، نۇرلان ونەربايەۆ، جانار دۇعالوۆا، جۇبانىش جەكسەن ۇلى، ميراس جۇگىنىسوۆ، سونداي-اق «دوس-مۇقاسان» ءانسامبلى مەن جاس دارىن ءادىل بەكتۇرسىن قاتىسىپ، كورەرمەنگە اسەرلى كەش سىيلادى. ءىس-شارا بارىسىندا زاماناۋي ەسترادالىق تۋىندىلار مەن حالىقتىق-پاتريوتتىق اندەر شىرقالىپ، وتان مەن تۋعان جەرگە دەگەن سۇيىسپەنشىلىكتى پاش ەتتى. كەشتىڭ ءسانىن كەلتىرگەن حورەوگرافيالىق قويىلىمدار مەن پلاستيكالىق بي كورىنىستەرىن Wake Up بالەت توبى دايىندادى.
كونسەرتتىڭ ەڭ ەرەكشە ءساتى – زاماناۋي تەحنولوگيا مەن ونەردىڭ توعىسۋى بولدى. كەيبىر مۋزىكالىق وڭدەۋلەر مەن ۆيزۋالدى شەشىمدەر جاساندى ينتەللەكت نەگىزىندەگى وتاندىق Higgsfield پلاتفورماسىنىڭ كومەگىمەن ازىرلەندى. شىعارماشىلىق سالاعا يننوۆاسيالىق شەشىمدەر ەنگىزۋ پرەزيدەنت قاسىم-جومارت توقايەۆ بەلگىلەگەن باعىتتىڭ ايقىن كورىنىسى. جاساندى ينتەللەكت پەن سيفرلىق تەحنولوگيانى دامىتۋ – ۇلتتىق باسەكەگە قابىلەتتىلىكتى ارتتىرۋدىڭ ماڭىزدى تەتىگى.
كەش سوڭىندا «اتامەكەن» ءانى شىرقالىپ، جينالعانداردى ماقتانىش سەزىمى كەرنەدى.
الماتى قالاسى اكىمدىگىنىڭ ۇيىمداستىرۋىمەن وتكەن بۇل مەرەكەلىك كەش رەسپۋبليكا كۇنىنە ارنالعان نەگىزگى وقيعا ەدى، ۇلت بىرلىگى مەن رۋحاني ساباقتاستىقتىڭ، سونداي-اق الماتىلىقتاردىڭ بەيبىتشىلىك پەن وركەندەۋگە دەگەن تالپىنىسىنىڭ ايقىن كورىنىسىنە اينالدى.
ايتا كەتەيىك، بۇگىن الماتىدا ەلىمىزدىڭ باستى مەرەكەلەرىنىڭ ءبىرى – رەسپۋبليكا كۇنى كەڭىنەن اتالىپ ءوتىپ جاتىر. مەرەكە قارساڭىندا سالتاناتتى ماراپاتتاۋ ءراسىمى ءوتىپ، قالا اكىمى دارحان ساتىبالدى مەملەكەت باسشىسى قاسىم-جومارت توقايەۆتىڭ اتىنان شاھار تۇرعىندارىنا قوعام، مادەنيەت، عىلىم، دەنساۋلىق ساقتاۋ جانە ەكونوميكا سالالارىنداعى ەلەۋلى ەڭبەكتەرى ءۇشىن مەملەكەتتىك ناگرادالار تابىستادى. قالا بويىنشا ءتۇرلى كونسەرتتەر، كورمەلەر مەن سپورتتىق شارالار ۇيىمداستىرىلىپ، ءاربىر جاننىڭ جۇرەگىندە ءبىر عانا سەزىم مازدادى. ول تاۋەلسىز ەلىمىزگە دەگەن شەكسىز سۇيىسپەنشىلىك!