كامەلەتكە تولماعان قىزدى اناسى الاياقتىق جولمەن تۇركياعا الىپ كەتكەن
ق ر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى سىرتقى ىستەر مينيسترلىگىنىڭ كومەگىمەن قازاقستان رەسپۋبليكاسىنىڭ كامەلەتكە تولماعان ازاماتىن تۇركيا رەسپۋبليكاسىنان ەلگە قايتارۋ بويىنشا جۇمىس جۇرگىزدى، دەپ حابارلايدى Zakon.kz.
16 جاستاعى قازاقستان ازاماتى وتانىمىزعا جەتكىزىلدى، ءقازىر قىز وتباسىمەن بىرگە اقتوبە قالاسىندا.
«16 جاستاعى قازاقستان ازاماتى بالا قۇقىقتارى جونىندەگى ۋاكىل ارۋجان سايننان ەلگە ورالۋىنا كومەك سۇرادى. وتىنىشتەن كامەلەتكە تولماعان قىزدى اناسى الاياقتىق جولمەن تۇركياعا الىپ كەتكەنى جانە ونىڭ ەركىنەن تىس ىستامبۇلداعى قىزدارعا ارنالعان مەدرەسەگە بەرگەنى انىقتالدى. سونىمەن قاتار بالا تۋىستارىمەن بايلانىسا الماي، قازاقستاندا جۇرگەن اكەسى مەن ەكى اعاسىن ساعىنعانىن ايتىپ شاعىمدانعان. ارۋجان سايننىڭ ءوتىنىشى نەگىزىندە ق ر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى قازاقستاننىڭ تۇركياداعى ەلشىلىگى ارقىلى ىستامبۇلدا بالانى ىزدەۋ ماسەلەسىن شۇعىل قولعا الدى. ق ر سىرتقى ىستەر مينيسترلىگىنىڭ كومەگىمەن بالا تابىلىپ، ونىڭ قازاقستانعا ورالۋىنا قاجەتتى كومەك كورسەتىلدى»، -دەدى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
بالالاردىڭ قۇقىقتارىن قورعاۋ كوميتەتى قازاقستاننىڭ كامەلەتكە تولماعان ازاماتتارىنىڭ مۇددەسى ءۇشىن جۇمىستى ودان ءارى جالعاستىرا بەرەتىنىن حابارلايدى.