تۇركى مەملەكەتتەرىنىڭ اقپارات اليانسى قۇرىلدى

ءتيىستى قۇجاتقا بەس ەلدىڭ وكىلدەرى تۇركيادا قول قويدى.

اليانستىڭ قۇرامىنا قازاقستاننان «Qazcontent»، تۇركيادان «انادولى»، ازەربايجاننان Azertac (ازەرتاج)، قىرعىزستاننان KABAR، وزبەكستاننان UZA حالىقارالىق اقپارات اگەنتتىكتەرى كىرەدى، دەپ حابارلايدى Almaty-akshamy.kz.

بۇدان بىلاي تۇركىتىلدەس مەملەكەتتەر اراسىندا اقپارات الماسۋ، جالعان جاڭالىقتارعا قارسى بىرلەسە كۇرەسۋ جانە ءوزارا تاجىريبە الماسۋ جەڭىلدەيدى. بۇدان بولەك «بۇقارالىق اقپارات قۇرالدارىنداعى بىرلىك جانە بولاشاققا كوزقاراس» تاقىرىبىندا وتكەن تۇركى مەملەكەتتەرى اقپاراتتىق اگەنتتىكتەرىنىڭ مەديا-فورۋمىندا سيفرلىق قۇرالداردى ءتيىمدى قولدانۋ جانە بىرلەسكەن جوبالاردى جۇزەگە اسىرۋ جايى دا تالقىلاندى.

«باۋىرلاس ەلدەردىڭ اقپارات اگەنتتىكتەرىنىڭ قاتىسۋىمەن وتكەن سامميت وسى سالادا بىرلەسىپ نە ىستەۋگە بولاتىنىن كورسەتەتىن بەتبۇرىستىڭ باستاۋى دەپ ۇمىتتەنەمىز. تۇركى اقپارات اگەنتتىكتەرى وداعىنىڭ قۇرىلۋى «تۇركى الەمى 2040 ستراتەگياسىنا» ۇلكەن ۇلەس قوسادى دەپ ويلايمىن. بۇگىندە كوممۋنيكاسيا، مەديا جانە اقپارات سالالارىندا قۋاتتى بولۋ - تاڭداۋ ەمەس، مىندەت»، -  دەدى تۇركيا پرەزيدەنتى جانىنداعى كوممۋنيكاسيا باسقارماسىنىڭ باسشىسى  فاحرەتتين التۋن. 

«تۇركى ەلدەرى ۇيىمىنىڭ مەرەيتويلى 10- شى ءسامميتى ءوتتى. سول جەردە مەملەكەت باسشىلارى، قازاقستان پرەزيدەنتى دە ىقپالداستىقتى بايلانىستى كۇشەيتۋ جونىندە كوپ ماسەلەلەر ايتىلدى. بۇگىنگى مىنا اليانس قۇرىلىپ جاتقانى سول مەملەكەت باسشىلارى باستاعان سونىڭ ءبىرى ايقىن دالەلى دەپ ەسەپتەيمىن. قولعا الىنىپ، ءىس جۇزىندە باستالىپ جاتقان شارۋانىڭ ءبىر بولىگى»، - دەيدى «Qazcontent» مەملەكەتتىك اقپاراتتىق اگەنتتىگىنىڭ باسقارما ءتوراعاسى بەكزات ءجۇسىپ.