تۋريزم جانە سپورت ءمينيسترى ەربول مىرزابوسىنوۆ ەلوردادا ساڭلاق سپورتشىلاردىڭ انالارمەن كەزدەستى. اتاپ ايتقاندا، داڭقتى بوكسشى، سيدنەي وليمپياداسىنىڭ چەمپيونى بەكزات ساتتارحانوۆتىڭ اياۋلى اناسى سىرلىكۇل ساتتارحانوۆانى جانە الەمگە ءماشھۇر مانەرلەپ سىرعاناۋشى، سوچي وليمپياداسىنىڭ قولا جۇلدەگەرى دەنيس تەننىڭ ارداقتى اناسى وكسانا تەندى قابىلدادى. بۇل تۋرالى سالا مينيسترلىگىنىڭ سايتىندا حابارلاندى.
مينيستر حالىقارالىق ارەنادا ەلىمىزدىڭ كوك تۋىن كوكتە جەلبىرەتىپ، ءانۇرانىمىزدى بايراقتى باسەكەلەردە شىرقاتقان ساڭلاقتار بۇگىندە ارامىزدان الىستاپ كەتسە دە، ولاردىڭ رۋحىن ۇلىقتاۋ جانە ەسىمىن ەل جادىندا ماڭگى ساقتاۋ جولىندا قوس انانىڭ ايانباي ەڭبەك ەتىپ جۇرگەنىن اتاپ ءوتتى.
«حالقىمىز «الىپ انادان تۋادى» دەپ بەكەر ايتپاعان. شىنىندا دا، ادام بويىنداعى اسىل قاسيەت پەن تاۋداي تالاپ انانىڭ اق سۇتىمەن داريدى. انا بالاسىنا بەرگەن تاربيەسى مەن شەكسىز ماحابباتى ونىڭ بولاشاعىنا جارقىن جول اشادى. سىزدەر ۇلدارىڭىزدى سپورت ۇيىرمەسىنە قارشادايىنان جەتەلەپ اپارىپ، چەمپيون اتانۋى ءۇشىن بارلىق جاعدايدى جاسادىڭىزدار. ساڭلاقتارىمىز ارامىزدان الىستاپ كەتسە دە، ولاردىڭ رۋحىن ۇلىقتاۋ، ەسىمىن ەل جادىندا ماڭگى ساقتاۋ جولىندا ايانباي ەڭبەك ەتىپ جۇرگەندەرىڭىزگە كۋامىز. باتىرلارىمىزدىڭ اتى وشپەي، ءالى كۇنگە دەيىن جاس جەتكىنشەكتەردىڭ كۋميرى بولىپ كەلە جاتقانى ەڭ الدىمەن، سىزدەردىڭ ارقالارىڭىز»، – دەدى ەربول مىرزابوسىنوۆ.
سونداي-اق مينيستر كەزدەسۋ بارىسىندا بەكزات پەن دەنيستىڭ ەل سپورتىنا سىڭىرگەن ەڭبەگى مەن جانكۇيەر جۇرەگىندە ساقتالعان جارقىن بەينەسىن جاڭعىرتۋ بارشامىزعا ورتاق مىندەت ەكەنىن ايتتى. سونداي-اق الداعى ۋاقىتتا قوس ساڭلاقتى جاستار اراسىندا ناسيحاتتاۋ ماقساتىندا بىرلەسە جۇمىس ىستەۋگە دايىن ەكەنىن جەتكىزدى.
بەكزات ساتتارحانوۆ – 2000 جىلعى سيدنەي وليمپياداسىنىڭ چەمپيونى، ازيا چەمپيوناتىنىڭ كۇمىس جۇلدەگەرى. سونداي-اق جاستار اراسىندا الەم جانە ازيا بىرىنشىلىگىنىڭ كۇمىس جۇلدەگەرى اتانعان.
دەنيس تەن – 2014 جىلعى سوچي وليمپياداسىنىڭ قولا جۇلدەگەرى، الەم بىرىنشىلىگىنىڭ كۇمىس جانە قولا مەدال يەگەرى. سونىمەن قاتار ءتورت قۇرلىق چەمپيوناتىنىڭ جەڭىمپازى، ازيا ويىندارى مەن ۋنيۆەرسيادا چەمپيونى.