ساپاسى جاقسى دەگەن پلاستيك ىدىستىڭ ءوزىنىڭ دە توزاتىن ۋاقىتى بار. ىدىستىڭ ىشكى جاعىندا مايدا سىزىقتار پايدا بولادى، فورماسى وزگەرەدى. ال ول ىدىستار ۋاقىت وتە جاعىمسىز ءيىس شىعارا باستايدى. ونىڭ نەگىزگى سەبەبى – ىدىسقا تۇسكەن سىزات بولۋى مۇمكىن، دەپ حابارلايدى aqshamnews.kz Ernur.kz-كە سىلتەمە جاساپ.
ول ىدىستى ءجيى پايدالانعاننان، ىستىق اسەرىنەن تۇسەدى. وسىنداي ىدىستاردان جاعىمسىز ءيىستىڭ كەتۋى قيىندايدى. ءيىسى كەتپەگەن ىدىستى تاستاۋعا اسىقپاڭىز. تومەندەگى تاسىلدەر ارقىلى جاعىمسىز ءيىستى كەتىرىپ، ىدىسىڭىزدى ۇزاعىراق پايدالانىڭىز.
كوفە
كوفە جاعىمسىز ءيىستى جاقسى كەتىرەدى. ول ءۇشىن ۇنتاقتالعان نەمەسە قايناتىلعان كوفە قالدىعىمەن ءيىسى شىققان ىدىس ءىشىن ىسقىلاپ ءسۇرتىپ شىعۋ كەرەك. كەيىن مۇزداتقىشقا سالىپ قويىڭىز. ءبىر تاۋلىكتەن سوڭ شىعارىپ، جۋىپ -شايىپ الىڭىز. ەشقانداي ءيىس قالمايدى.
اس سوداسى
بۇل وتە ۇنەمدى جانە تيىمدىلىگى سىناقتان وتكەن نۇسقالاردىڭ ءبىرى. اس سوداسىن 1:2 مولشەردە سۋمەن ارالاستىرىپ بىلامىق جاساپ الامىز. وسى بىلامىقپەن ىدىستىڭ ءىشىن ءسۇرتىپ، قاقپاعىن جابامىز. وسى كۇيى تۇنگە قالدىرىپ، ەرتەڭىنە شايىپ، تازارتىپ الامىز.
سىركەسۋ
سىركەسۋى قىشقىلى پلاستيك ىدىستاعى ءيىستى تولىق جويىپ جىبەرە الادى. ول ءۇشىن سىركەسۋى قىشقىلىن بولمە تەمپەراتۋراسىنداعى سۋمەن 4/1 مولشەردە ارالاستىرىپ، ىدىسقا قۇيىپ قويامىز. تيىمدىلىگى ارتا ءتۇسۋ ءۇشىن ىدىس جۋاتىن سۇيىقتىقتان 2-3 تامشى قوسۋعا بولادى. 3 ساعاتتان كەيىن تازارتىپ الامىز.
گازەت
بۇل جەردە ءبارى قاراپايىم. ول ءۇشىن بار بولعانى گازەتتى جىرتىپ، مىجىپ ىدىسقا تولتىرا سالۋ كەرەك. قاقپاعىن جاۋىپ، 5-6 ساعاتقا قالدىرامىز. گازەت ىدىس ىشىندەگى ءيىس پەن ىلعالدى وزىنە تولىق تارتىپ الادى. بۇل قۇرعاق تازارتۋعا جاتادى. مۇنىڭ ورنىنا اعاش كۇلىن قولدانسا دا بولادى.
ليمون
ليمون جەمىسى ىدىستاعى ءيىستى عانا ەمەس، سونداي-اق تۇرىپ قالعان ماي مەن كىردى دە جاقسى كەتىرەدى. ول ءۇشىن ليموننىڭ جارتىسىمەن ىدىس ءىشىن ىسقىلاپ ءسۇرتىپ قويامىز. كۇنى بويىنا بەتىن جاۋىپ قالدىرىپ، كەيىن شايىپ الامىز.
ۆانيلين
پىسىرمەلەرگە قوساتىن ادەمى ءيىسى بار دامدەۋىش ىدىستاعى ءيىستى جويىپ جىبەرەدى. ول ءۇشىن ءيىسى شىققان ىدىستى جىلى سۋعا تولتىرىپ، شاي قاسىقپەن ۆانيلين سالامىز. بەتىن جاۋىپ 4-5 ساعاتتان كەيىن جۋىپ، تازارتىپ الۋ قاجەت.
حلورلى اعارتقىش
بۇل ءتاسىلدى قاتتى قاجەت بولماسا، ءجيى جاساۋ ۇسىنىلمايدى. حلور تەك زالالسىزداندىرمايدى، سونىمەن بىرگە جينالىپ قالعان كىردى دە جاقسى كەتىرەدى. اعارتقىش پەن سۋدى 1:1 مولشەردە ارالاستىرىپ، ءيىسى بار ىدىسقا قۇيىپ 3،5 ساعاتقا قالدىرامىز. كەيىننەن بىرنەشە مارتە قايتارا سۋمەن شايىپ تازارتامىز. حلورلى اعارتقىشتىقى ءتۇرلى-تۇستى پلاستيك ىدىستارعا قولدانۋعا بولمايدى.
ساپاسى جاقسى دەگەن پلاستيك ىدىستىڭ ءوزىنىڭ دە توزاتىن ۋاقىتى بار. ىدىستىڭ ىشكى جاعىندا مايدا سىزىقتار پايدا بولادى، فورماسى وزگەرەدى. سوندىقتان مۇنداي ىدىستى ءجيى اۋىستىرىپ تۇرۋ كەرەك نەمەسە شىنى، ەمالدى ىدىستارمەن ارالاستىرىپ ۇستاعان دۇرىس. كەرەك كەڭەس، قاجەتتەرىڭىزگە جاراسىن!