تۇرىك مادەنيەتى جانە مۇراسى قورى مەن قىزىلوردا وبلىسى اكىمدىگىنىڭ بىرلەسكەن ۇيىمداستىرۋىمەن قازاقستان رەسپۋبليكاسىنىڭ قىزىلوردا وبلىسى، قارماقشى اۋدانىندا ورنالاسقان "قورقىت اتا" مەموريالدىق كەشەنىندە تۇركى حالىقتارىنىڭ فولكلورلىق-مۋزىكالىق ونەرىنە ارنالعان "قورقىت جانە ۇلى دالانىڭ اۋەندەرى" اتتى VII حالىقارالىق فەستيۆال اشىلدى.
"ادەبيەت جانە ونەر" پورتالىنا تۇرىك مادەنيەتى جانە مۇراسى قورىنان بەرىلگەن مالىمەتكە سايكەس، فەستيۆالگە ازەربايجان، قازاقستان، قىرعىزستان، تۇركيا، وزبەكستان، تىۆا جانە التايدان كەلگەن 200-گە جۋىق ونەر شەبەرلەرى قاتىسۋدا. بۇل فەستيۆال قىزىلوردانىڭ قازاقستاننىڭ استاناسى (1925–1927 جىلدارى) بولىپ جاريالانۋىنىڭ 100 جىلدىعىنا ارنالعان.
حالىقارالىق شارانىڭ باستى ماقساتى — تۇركى حالىقتارىنىڭ باي مادەنيەتىن، ۇلتتىق مۋزىكاسىن جانە رۋحاني قۇندىلىقتارىن ناسيحاتتاۋ، سونداي-اق حالىقارالىق مادەني بايلانىستاردى نىعايتۋ.
سالتاناتتى اشىلۋ راسىمىندە تۇرىك مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا مەن قىزىلوردا وبلىسىنىڭ مادەنيەت، ارحيۆ جانە قۇجاتتاما باسقارماسىنىڭ باسشىسى جانمۇرات سەيىلوۆ قۇتتىقتاۋ ءسوز سويلەپ، فەستيۆال قاتىسۋشىلارىنا شىعارماشىلىق تابىس تىلەدى. مەرەكەلىك كەشتە تۇركى ەلدەرىنەن كەلگەن ءداستۇرلى مۋزىكالىق ونەردىڭ تانىمال ورىنداۋشىلارى كورەرمەندەردى ەرەكشە ونەر كورسەتىلىمدەرىمەن قۋانتتى.
كەلەسى كۇنى تۇركى ەلدەرىنىڭ فولكلورلىق-مۋزىكالىق ونەرىنە ارنالعان "قورقىت جانە ۇلى دالانىڭ اۋەندەرى" حالىقارالىق فەستيۆالى اياسىندا "قورقىت مۇراسى: تۇركى دۇنيەسى ءۇشىن ورتاق ەپيكالىق قۇندىلىقتار" اتتى حالىقارالىق عىلىمي-تەوريالىق كونفەرەنسيا ءوتتى. كونفەرەنسياعا تۇرىك مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا، قىزىلوردا وبلىسىنىڭ اكىمى نۇرلىبەك نالىبايەۆ سونداي-اق تۇركى ەلدەرىنىڭ مادەنيەت، تاريح جانە ادەبيەت سالالارىنداعى جەتەكشى عالىمدارى مەن ساراپشىلارى قاتىستى.
ءىس-شارانىڭ باستى ماقساتى – قورقىت مۇراسىنىڭ جانە ونىڭ ەپيكالىق داستۇرلەرىنىڭ تۇركى حالىقتارىنىڭ رۋحاني ءارى مادەني ومىرىندەگى ماڭىزىن جان-جاقتى تالقىلاۋ، عىلىمي زەرتتەۋلەردى دامىتۋ جانە حالىقارالىق ىنتىماقتاستىقتى نىعايتۋ بولدى. كونفەرەنسيا بارىسىندا "قورقىت اتا كىتابىنىڭ" تاريحي نەگىزدەرى، ونىڭ تۇركى الەمىندەگى ءرولى، سونداي-اق زاماناۋي مادەنيەت پەن ادەبيەتتەگى كورىنىسى تاقىرىپتارىندا پىكىر الماسۋلار جۇرگىزىلدى. عالىمدار وزدەرىنىڭ جاڭا عىلىمي زەرتتەۋ ناتيجەلەرىن ۇسىندى جانە قورقىت مۇراسىن زەرتتەۋدەگى قازىرگى تەوريالىق تاسىلدەرىمەن ءبولىستى.
تۇرىك مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا ءوز سوزىندە كونفەرەنسيا قاتىسۋشىلارىن قۇتتىقتاپ، قورقىتتىڭ ۇلى مۇراسىن ساقتاۋ مەن ونى الەمدىك دەڭگەيدە تانىتۋدىڭ ماڭىزدىلىعىن اتاپ ءوتتى. كونفەرەنسيا اياسىندا عىلىمي باياندامالار تىڭدالدى، پانەلدىك پىكىرتالاستار ءوتتى، سونداي-اق "تۇركى فولكلورلىق مۇراسى" انتولوگياسى جوباسى اياسىنداعى "تۇركى قاھارماندىق ەپوسى" سەرياسىنىڭ العاشقى تومى تانىستىرىلدى.
ءىس-شارا سوڭىندا قازاقستاننىڭ ەڭبەك سىڭىرگەن ونەر قايراتكەرى، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ دوسەنتى ءۇلجان بايبوسىنوۆا "كورۇعلى" پوەماسىنان جانە سىر ەلىنىڭ جىراۋلارىنا ءتان بىرنەشە جىر ۇزىندىلەرىن ورىندادى.
بۇل حالىقارالىق كونفەرەنسيا تۇركى دۇنيەسىندەگى ەپيكالىق شىعارماشىلىق داستۇرلەردىڭ بىرلىگى مەن ءوزارا بايلانىسىن نىعايتۋعا ارنالعان ماڭىزدى الاڭ بولۋمەن قاتار، تۇركى حالىقتارىنىڭ رۋحاني مۇراسىن ساقتاۋ جانە ناسيحاتتاۋ جولىنداعى ايتۋلى قادام رەتىندە باعالاندى.