كەشە ۇكىمەت ساعاتى ىشكى ىستەر مينيسترلىگىندە ءوتتى. دەپۋتاتتار ىشكى ىستەر ءمينيسترى ەرجان سادەنوۆكە بىرنەشە ساۋال جولدادى، - دەپ حابارلايدى aqshamnews.kz ءتىلشىسى.
"1،5 ملن كامەرامىز بار، 58 پايىز قىلمىس اشىلدى دەپ وتتىرسىز. قاراپايىم سۇراق: نەگە جوعالعان، ۇرلانعان سمارتفوندار تابىلمايدى؟ ءبىر جارىم جىل بولدى، ەسىل اۋدانى پوليسيا بولىمشەسىندە مەنىڭ ارىزىم جاتىر. جارايدى، مەنى قويشى، جالپى قاراپايىم حالىق سمارتفونىن جوعالتىپ الادى. جاي عانا تەلەفونىمىزدى تابا الماي جاتقاندا، جوعارى، جاھان ماسەلەلەرىن ايتقان قىزىق كورىنەدى ەكەن"، - دەدى ءماجىلىس دەپۋتاتى سامات نۇرتازا.
سامات نۇرتازانىڭ وكپە-نازىن ارىپتەستەرى دە جالعاپ كەتتى. ماجىلىسمەن باقىتجان بازاربەك اقتوبەدە جابىرلەنۋشىدەن ميلليون تەڭگە سۇراعان پوليسەي مەن شىمكەنتتە بودي-ماسساج ستۋدياسىن قاناتىنىڭ استىنا الىپ قورعاشتاعان ءتارتىپ ساقشاسىن مىسالعا كەلتىردى.
"حالىقتىڭ پوليسەيلەرگە دەگەن سەنىمىن ارتتىرامىز دەپ، ءبىز مىندا شاپقىلاپ جۇرگەندە، وڭىرلەردە ءتۇرلى ماسقارانى كورىپ جاتىرمىز. ماسەلەن، جەتىسۋ وبلىسىندا زاتتاي دالەل بولعان 24 ميلليون تەڭگەنى ءتارتىپ ساقشىسى قولدى قىلعان. شىمكەنت شاھارىندا پوليسەيلەر بودي-ماسساج جاسايتىن جىن-ويناق سالوندى وزدەرى بيلەپ-توستەپ، ەشكىم تيمەيتىندەي قورعاشتاپ ءجۇرىپتى"، - دەدى ءماجىلىس دەپۋتاتى باقىتجان بازاربەك.
"ۇزەڭگىلەستەرىنىڭ اتىنا كىر كەلتىرىپ، تۇتاس قازاق پوليسياسىن جامان اتتى قىلاتىندارمەن اڭگىمە قىسقا دەگەن ءسوزىن" بۇگىن مينيستر سادەنوۆ تاعى قايتالادى. ايلىق تا 30 پايىزعا ءوستى، سوندىقتان ارتىق قىلتىڭ-سىلتىڭدى قويىپ، پوليسەيدىڭ بار نازارى جۇمىستا بولۋى كەرەك.
ەرجان سادەنوۆ ارىپتەستەرىنە پوگونداعى جۇلدىز سانى وسكەن سايىن، قىزمەتتەگى جالاقىسى دا، لاۋازىمى دا جوعارىلايدى دەدى. تەك بارلىعىنا شىدام كەرەك. ال لاۋازىمىن اسىرا سىلتەپ پايدالانىپ، "پوليسەي" دەگەن اتتى كىرلەتكەندەر جۇمىستان قۋىلادى، قالا بەردى جاساعان تىرلىگىنە وكىنەتىن بولادى دەدى جاۋاپتى شەنەۋنىك.