مەملەكەت باسشىسىنىڭ «اكىمدەردىڭ حالىقپەن كەزدەسۋلەرىن وتكىزۋ تۋرالى» جارلىعىنا سايكەس، كەشە الماتى قالاسى ناۋرىزباي اۋدانىنىڭ اكىمى سانجار توعاي اۋدان تۇرعىندارىمەن كەزدەستى.
كەزدەسۋ بارىسىندا اۋدان اكىمى اۋداندا اتقارىلعان جۇمىستار تۋرالى ەسەپ بەردى.
- 2021 جىلى ناۋرىزباي اۋدانىنا قۇيىلعان ينۆەستيسيا 126 ملرد تەڭگەنى قۇرادى؛
- شاعىن جانە ورتا بيزنەس سۋبەكتىلەرى 11108 دانا بولدى؛
- مەملەكەتتىك باعدارلاما نەگىزىندە 179 سۋبەكتىگە 897،1 ملرد تەڭگە كولەمىندە كومەك كورسەتىلدى؛
- «بيزنەستىڭ جول كارتاسى – 2025» باعدارلاماسىنىڭ نەگىزىندە 150 جوبا، «ەڭبەك 2017–2021 جىلدارى» 13 جوبا ىسكە اسىرىلىپ جاتىر؛
- 3300 جاڭا جۇمىس ورنى قۇرىلدى؛
- اۋدان كوشەلەرىنىڭ 85%، ياعني 348 كوشە اسفالتتالعان؛ • 2021 جىلى جالپى ەسەپتە 150 كوشەگە شۇڭقىرلاردى جاماۋ جۇمىستارى جۇرگىزىلگەن؛
- 18 سپورت الاڭى، بالالارعا ارنالعان 16 ويىن الاڭى قۇرىلدى. سونداي-اق، سانجار ءادىل ۇلى الداعى ۋاقىتتا اتقارىلاتىن جوبالار ءتىزىمىن دە ايتىپ ءوتتى. جاقىن ارادا ورىندالاتىن جۇمىستاردىڭ قاتارىنا 150 مىڭ ادامدى سۋمەن قامتيتىن «اقساي» سۋ ستانسياسىنىڭ، مەملەكەتتىك باعدارلاما نەگىزىندە 6 مەكتەپ سالۋدىڭ جانە وزگە دە ينفراقۇرىلىمدىق جوبالاردىڭ كىرگەنى ايتىلدى.
قىسقاشا باياندامادان كەيىن اۋدان اكىمى تۇرعىنداردى تولعاندىراتىن سۇراقتارعا جاۋاپ بەردى. تۇرعىندار تاراپىنان سۋ جەتىسپەۋشىلىگىنە، كارىز قۇبىرلارىنىڭ بولماۋىنا، قاۋىپسىزدىككە بايلانىستى جانە وزگە دە وزەكتى ماسەلەلەر بويىنشا سۇراقتار قويىلدى. اۋدان اكىمى ايتىلعان سۇراقتاردىڭ باسىم بولىگىنە جيىن باسىندا جاۋاپ بەرىپ، كەيبىر ماسەلەلەردى جەكە قاراۋىنا الاتىنىن ەسكەرتتى.
ايتا كەتكەن ءجون، ەل پرەزيدەنتىنىڭ تاپسىرماسىن ىسكە اسىرۋ بارىسىندا ناۋرىزباي اۋدانىنىڭ اكىمى س.توعاي 5 رەت كوشپەلى كەزدەسۋ جانە 27 قابىلداۋ وتكىزدى. وعان بارلىعى 691 ادام قاتىسىپ، 252 سۇراققا جاۋاپ بەرىلدى. ونىڭ ىشىندە 72 ماسەلە شەشىمىن تاپتى، 87-سىنە تۇسىنىكتەمە بەرىلدى جانە 93 ماسەلە قارالۋ ۇستىندە.