«قىزىردىڭ قامشىسى» امالى ادەتتەگىدەن ەرتە كورىنىس بەردى
وتكەن جىلى «كوكتەم ەرتە كەلەدى» دەپ، باتىستىڭ بۇكىل اقپارات قۇرالدارى جامىراسا جازعان ەدى. دەسە دەگەندەي، ءساۋىر ايى شۋاقتى بولىپ، ءتىپتى ىستىق بولىپ باستالدى. ايتسە دە، باسىندا ەكى-ۇش كۇن شۋاقتى بولعانىمەن، سوڭى جاۋىن-شاشىنعا ۇلاستى.
الماتى قالاسىندا دا، ماڭىنداعى ەلدى مەكەندەردە دە ەرىگەن قار سۋىنىڭ سالدارىنان سۋ تاسقىنى ورىن الدى.
بۇگىن ءساۋىر ايىنىڭ 14-جۇلدىزى. اي ەسەبىنشە، ايدىڭ 11ء-ى. ال قازاقى جۇيە بويىنشا، ءساۋىردىڭ 1-جاڭاسى. اپتا ايدىڭ باسىن دا، ورتاسىن دا، سوڭىن دا قامتىپ تۇر. دەمەك، اپتا قۇبىلمالى بولۋى مۇمكىن. پايىمدا ايتىلعانداي، اپتانىڭ ءار كۇنىندە نوسەر، جاڭبىر ورىن الۋى عاجاپ ەمەس...
ەرتەڭ «قىزىر قامشىسى» امالى باستالادى. امال كەزىندە العاشقى نايزاعاي ويناپ، جاڭبىر جاۋىپ، جەر بۋسانادى. حالىق وسى نايزاعايدىڭ جارقىلىن «قىزىردىڭ قامشىسى» وينادى دەپ اتاعان. كەي جىلدارى ءبىر كۇندىك سۋىق ورىن الاتىن بولعان. كوك ءجۇزىن جازدىڭ بۇلتى قاپتايدى. «قىزىردىڭ قامشىسى» ويناعاننان كەيىن قىس ءبىرجولاتا كەتەدى دەپ ساناعان. قازاقى پايىم وسىلاي بولجام جاساعان.
ءقازىر «وتامالى» ءجۇرىپ جاتىر. بۇل امالدى اسان قايعى بابامىز «ويىلعان قىس» دەپ تە اتاعان. بالكىم، وسى امالدىڭ اسەرى مە، الماتىدا بيىل كۇن ەرتە كۇركىرەدى. نايزاعاي مەن جاڭبىر ەرتە كورىنىس بەردى. ورىك گۇلىن اشىپ بولدى. شيە، قارا ورىك گۇلدەي باستادى، ارجاعىندا الما كەزەگىن كۇتىپ تۇر. اسەم دە ارۋ الماتىنىڭ الۋان ءتۇرلى گۇلگە بولەنىپ، نۇرعا كەنەلىپ تۇرعان شاعى بۇل. ورىك ادام اعزاسىنا اسا پايدالى دارۋمەندى بويىنا جيناعان، حالقىمىزدىڭ سۇيىكتى جەمىس اعاشتارىنىڭ ءبىرى. اسىعىس، الىپ ۇشپا مىنەزىمەن قازاققا ۇقساس. قازاقتىڭ مىنەزى قىزىق قوي. الدا نە تۇرعانىن بايىپتاي، باعدارلاي بەرمەيدى. تاۋەكەلشىل حالىق. ورىك تە سونداي، كوكتەم كەلىپ، كۇن ءسال جىلت ەتسە بولدى، جاپىراعىن جايىپ، گۇلىن شاشىپ، شىرايلانىپ شىعا كەلەدى. سۋىققا تەز ءارى كوپ ۇرىندىراتىن دا وسى مىنەزى.
تاڭىردەن تىلەرىمىز – وڭتۇستىك استانانىڭ شۋاقتى شاعىن «وتامالىنىڭ» قۋاتتى جەل-ىزعارى الاي-دۇلەي كۇيگە ءتۇسىرىپ، گۇل-تۇينەگىن ءۇسىرىپ وتاپ، ويرانداپ كەتپەسە بولعانى...
الداعى اپتادا قازاقى پايىم بويىنشا، جاۋىن-شاشىننىڭ ءجيى ورىن الۋى، سالقىندىق سەزىلۋى مۇمكىن.