مەملەكەت باسشىسى قاسىم-جومارت كەمەلۇلىنىڭ «جاڭا قازاقستان: جاڭارۋ مەن جاڭعىرۋ جولى» اتتى حالىققا جولداۋى ەلىمىزدىڭ ساياسي جانە ينستيتۋسيونالدى دامۋىنداعى جاڭا كەزەڭنىڭ باستاۋى بولدى دەگەن ويدامىن.
پرەزيدەنت ەلىمىزدە قوردالانعان پروبلەمالاردى جانە قوعامنىڭ كوتەرىپ جۇرگەن تۇبەگەيلى ماسەلەلەرىن شەشۋ ماقساتىندا ءارى قازاقستانداعى بيلىكتىڭ باعىتتارى اراسىنداعى بالانستى قامتاماسىز ەتۋ جانە دەموكراتيا قۇندىلىقتارىن نىعايتۋ ماقساتىندا ۇلكەن رەفورمالاردى بەلگىلەدى.
"مەملەكەت ءار ۋاقىتتا حالىقتىڭ پىكىرىمەن ساناسۋى قاجەت. وسى رەتتە بىرنەشە جىل بۇرىن ازىرلەنىپ، ىسكە اسىرىلا باستاعان «حالىق ۇنىنە قۇلاق اساتىن مەملەكەت» قاعيداتىنىڭ ماڭىزدىلىعىنا كوز جەتكىزدىك. جولداۋدا «حالىققا قاجەتتى رەفورمالاردى جۇزەگە اسىرۋ – مەنىڭ مەملەكەت باسشىسى رەتىندەگى باستى مىندەتىم. ساياسي جاڭعىرۋ بولماسا، ەلىمىزدى ورنىقتى دامىتۋ، اۋقىمدى الەۋمەتتىك-ەكونوميكالىق وزگەرىس جاساۋ مۇمكىن ەمەس" دەپ ناقتى مالىمدەلگەن بولاتىن.
كەشەندى رەفورمالاردىڭ العاشقىسى – قازاقستان سۋپەر پرەزيدەنتتىك بيلىكتەن قاۋھارى مول پارلامەنتتىك رەسپۋبليكاعا ترانفورماسيالانۋى. جالپى، ەلىمىزدە ىسكە اسىرىلىپ كەلە جاتقان دەمونوپوليزاسيا، شاعىن جانە ورتا بيزنەستىڭ كەڭىنەن دامۋىنا جول اشۋ، قاراپايىم ازاماتتاردىڭ ءوز جەكە بيزنەسىن باستاۋعا مول مۇمكىندىكتەر بەرۋگە ارنالعان وزگەرىستەر تىزبەگى ورىندى دەپ ەسەپتەيمىن. سەبەبى، ەكونوميكالىق قاعيداتتار مەن تاجىريبەلەرگە جۇگىنسەك، كۇشتى مەملەكەت پەن تۇراقتى قوعام – تۇرمىسى قالىپتى ورتا توپقا جاتاتىن ازاماتتاردىڭ ۇلەس سالماعىنىڭ مول بولۋىنا تىكەلەي بايلانىستى.
كەلەسى ماڭىزدى ماسەلە – جەرگىلىكتى وكىلدى بيلىكتىڭ، ياعني ءماسليحاتتىڭ جۇمىسىن جەتىلدىرىپ، ءرولىن كۇشەيتۋ. پرەزيدەنت ناقتى اتاپ وتكەندەي، «ازاماتتاردىڭ وكىلدى بيلىككە دەگەن سەنىمىن نىعايتۋ ءۇشىن ءماسليحاتتارعا باسا ءمان بەرگەن ءجون. مىقتى ءماسليحاتتار وزەكتى ماسەلەلەردىڭ شەشىمىن تابۋعا جانە ايماقتارداعى تۇرمىس ساپاسىن جاقسارتۋعا اسەر ەتە الادى». الداعى ۋاقىتتا ءماسليحاتتارعا ءوڭىر اكىمدەرىن ۇسىنۋ بارىسىندا پرەزيدەنت ەكى ۇمىتكەردىڭ كانديداتۋراسىن ەنگىزەتىن بولادى.
ءماسليحات – حالىقتىڭ مۇددەسىن ءبىلدىرىپ، ازاماتتاردىڭ تۇرمىسىن ارتتىرۋ، اۋماق شەڭبەرىندەگى ماڭىزدى شەشىمدەر مەن ەرەجەلەردى قابىلداۋ، قوعامدىق تىڭداۋلار وتكىزۋ جانە ءوڭىردىڭ الەۋمەتتىك-ەكونوميكالىق دامۋىنا زور ۇلەس قوسۋعا ارنالعان وكىلدى ورگان. الماتى ءماسليحاتى جۇرتشىلىقپەن تىعىز جۇمىس ىستەپ، جاڭا باستامالار مەن ءىرى جوبالاردىڭ ۇيىتقىسى بولىپ كەلەدى. جاقىندا ەلىمىزدە العاش رەت الماتى قالاسىندا بيۋدجەتتىڭ جوباسى پىسىقتالىپ، قالىپتاستىرىلا باستاعاندا، ءبىرىنشى كەزەكتە ءماسليحات دەپۋتاتتارىنىڭ قاراۋىنا ەنگىزۋ جونىندەگى قالا اكىمىنىڭ وكىمى كۇشىنە ەندى. دەپۋتاتتار حالىق ءۇشىن، بەلگىلى ءبىر كوشەلەر مەن شاعىناۋدانداردىڭ تۇرعىندارى ءۇشىن الەۋمەتتىك ماڭىزعا يە سۇراقتار مەن وزگە وزەكتى ماسەلەلەردى بيۋدجەت جوباسىنا باستاپقى كەزەڭدە ەنگىزەتىن بولادى. بۇل - ۇلكەن رەفورمالاردىڭ العاشقى قادامدارى.
الداعى جاقىن ۋاقىتتا، كونستيتۋسيالىق زاڭدارعا وزگەرىستەر ەنگىزىلگەننەن كەيىن ءماسليحاتتار جۇمىسىنىڭ قارقىنى ارتىپ، ەل مۇددەسىن قورعاۋ جولىنداعى قۇزىرەتى كۇشەيتىلەتىن بولادى.