پرەزيدەنت پەتر فيالانىڭ ەلىمىزگە ساپارى ەكىجاقتى قاتىناستاردى نىعايتۋعا ىقپال ەتەتىنىنە سەنىم ءبىلدىردى.
قاسىم-جومارت توقايەۆ قازاقستانعا رەسمي ساپارمەن كەلگەن چەحيا رەسپۋبليكاسىنىڭ پرەمەر-مينيسترى پەتر فيالانى قابىلدادى، دەپ حابارلايدى Almaty-akshamy.kz اقورداعا سىلتەمە جاساپ.
«ءسىز ەلىمىزگە ۇلكەن بيزنەس-دەلەگاسيا الىپ كەلدىڭىز. ەكى ەل اراسىنداعى ىسكەرلىك بايلانىستار مەن ىنتىماقتاستىقتى ىلگەرىلەتۋگە پايداسى وتە زور بيزنەس فورۋم وتەدى»، – دەدى قاسىم-جومارت توقايەۆ.
كەزدەسۋ بارىسىندا ساۋدا-ەكونوميكالىق جانە ينۆەستيسيالىق ىنتىماقتاستىقتى، سونىڭ ىشىندە كولىك-لوگيستيكا سالاسىن نىعايتۋ پەرسپەكتيۆالارىنا باسا ءمان بەرىلدى. پرەزيدەنت چەح ينۆەستورلارىنا جان-جاقتى قولداۋ كورسەتۋگە دايىن ەكەنىن ايتتى.
«چەحيا رەسپۋبليكاسىنان ەنەرگەتيكا، ماشينا جاساۋ، كولىك، اۋىل شارۋاشىلىعى، قارجى، مەديسينا ونەركاسىبى جانە فارماسيەۆتيكا سەكىلدى ەكونوميكانىڭ ءتۇرلى سالالارىنا قۇيىلاتىن ينۆەستيسيانى قۇپتايمىز. سونداي-اق ەلدەرىمىزدىڭ استانالارى اراسىندا تىكەلەي اۋە قاتىناسىن اشامىز دەپ سەنەمىز»، – دەدى مەملەكەت باسشىسى.
پەتر فيالا چەحيانىڭ ەلىمىزبەن اراداعى ىنتىماقتاستىقتى ودان ءارى دامىتۋعا نيەتتى ەكەنىن راستادى.
«چەحيا رەسپۋبليكاسى قازاقستانمەن بۇرىننان دوستىق قارىم-قاتىناس ورناتقان جانە ونى جالعاستىرامىز دەپ سەنەمىز. وسى كەزدەسۋىمىز بەلسەندى بايلانىستارعا تىڭ سەرپىن بەرەدى دەپ ۇمىتتەنەمىن. قازاقستان – ءبىز ءۇشىن وتە ماڭىزدى سەرىكتەس. قازاقستان مەن چەحيا رەسپۋبليكاسىنىڭ ىنتىماقتاستىعى ەۋروپالىق وداق پەن ورتالىق ازيا ەلدەرى اراسىنداعى قارىم-قاتىناستاردىڭ اسا ماڭىزدى تىرەگىنىڭ ءبىرى سانالادى»، – دەدى چەحيا پرەمەر-مينيسترى.