قازاقستان پرەزيدەنتى قاسىم-جومارت توقايەۆ ينۆەستيسيالارعا قاتىستى تاپسىرمانى ورىنداۋ ءۇشىن پرەمەر-مينيستر ولجاس بەكتەنوۆكە 10 كۇن بەردى، دەپ حابارلايدى اqshamnews.kz.
مەملەكەت باسشىسى حالىققا جولداۋىندا قازاقستانعا ينۆەستيسيالىق قاراجاتتىڭ قايدا، نە ءۇشىن جانە قانداي كولەمدە قاجەت ەكەنىن ناقتى ايقىنداۋ قاجەتتىگىن ايتتى.
توقايەۆ ينۆەستيسيالارعا سۇرانىس وندىرىستىك سەكتوردىڭ قاجەتتىلىكتەرىنە سايكەس قالىپتاسۋى ءتيىس ەكەنىن اتاپ ءوتتى. پرەزيدەنتتىڭ ايتۋىنشا، ەلدە ينۆەستورلارمەن ءوزارا ءىس-قيمىلدىڭ كولەمدى ءارى بىتىراڭقى جۇيەسى قالىپتاسقان.
"بۇل ءسوزسىز بيۋروكراتياعا، فۋنكسيالاردىڭ قايتالانۋىنا الىپ كەلەدى. سونىڭ سالدارىنان جۇمىس قاناعاتتانارلىق دەڭگەيدە اتقارىلماي وتىر. قازىرگى كۇردەلى جاعدايدا ينۆەستيسيا تارتۋ – بىزدەن جاڭا تاسىلدەردى تالاپ ەتەتىن ءبىرىنشى كەزەكتەگى مىندەت. ءاربىر جاعدايدا ينۆەستيسيا تارتۋعا قاتىستى بارلىق ۇيىمداستىرۋ جۇمىسى پرەمەر-مينيسترگە تولىق جۇكتەلەتىنىن ەرەكشە اتاپ وتكىم كەلەدى. جاڭا مينيسترلىك قۇرۋدىڭ قاجەتتىلىگى جوق، الايدا مەملەكەتتىك ورگانداردىڭ اتاۋىندا “ينۆەستيسيا” ءسوزى جوق ەكەنى كوزگە ۇرادى.
بۇل ماسەلە 3-4 مەكەمەنىڭ قۇزىرەتىندە بولىپ، شەشىمىن تاپپاي وتىر. سوندىقتان پرەمەر-مينيسترگە ناقتى ۇسىنىستار ازىرلەۋ ءۇشىن 10 كۇن بەرەمىن. سونىمەن قاتار ۇكىمەتكە ينۆەستيسيا تارتۋ جۇيەسىن تۇبەگەيلى جاڭعىرتۋ جونىندەگى ءىس-قيمىل جوسپارىن قىسقا مەرزىمدە دايىنداۋدى تاپسىرامىن"، – دەدى مەملەكەت باسشىسى.
ەسكە سالا كەتەيىك، 8 قىركۇيەكتە پرەزيدەنت حالىققا جولداۋ جاساپ، الداعى جىلعا ارنالعان «ەلدىڭ ەكونوميكالىق جانە الەۋمەتتىك ساياساتىنىڭ ماڭىزدى ماقساتتارى مەن مىندەتتەرىن» ايقىندايدى.