جاقىندا عانا جاڭارتۋدان وتكەن الماتىداعى تەررەنكۋر بۇگىندە قالا تۇرعىندارىنىڭ سۇيىكتى ورنىنا اينالدى. العاشقى كۇندەرى بۇل جاڭا دەمالىس ورنىنا كۇنىنە 3 مىڭداي ادام كەلسە، ءقازىر ولاردىڭ سانى 10 مىڭنان اسقان.
اپپارات باسشىسى جاڭارتىلعان ينفراقۇرىلىمدى ساقتاۋدىڭ ماڭىزدىلىعىنا توقتالىپ، شاعىن ساۋلەت نىساندارىن كۇندەلىكتى كۇتىپ-ۇستاۋ، اقاۋلاردى دەر كەزىندە جويىپ، بەينەباقىلاۋ كامەرالارىن ورناتۋ جانە كەلۋشىلەرگە ىڭعايلى بولۋ ءۇشىن اۆتوتۇراق ورىندارىن قاراستىرۋدى تاپسىردى، دەپ حابارلايدى Aqshamnews.kz.
زەنكوۆ كوشەسىندەگى «حالىق قاتىساتىن بيۋدجەت» اياسىندا جوندەلەتىن اۋلالاردى ارالاۋ كەزىندە اۆتوسۋارۋ جۇيەسىنىڭ جۇمىس ىستەمەي تۇرعانىنا نازار اۋدارىلىپ، ونىڭ سەبەبىن انىقتاۋ مىندەتتەلدى. سونداي-اق، اۋلالارعا جارىق بەرۋدى ۇيىمداستىرۋ مەن ۋاكىلەتتى ورگانداردىڭ رۇقساتىمەن اعاشتاردى كۇتىپ-باپتاۋ قاجەتتىلىگى ايتىلدى.
اپپارات باسشىسى مەردىگەر كومپانيا وكىلىنە جوندەۋ جۇمىستارى ايدىڭ سوڭىنا دەيىن اياقتالماسا، سوتقا جۇگىنىپ، مەردىگەردى جاۋاپسىز دەپ تانۋ ءۇشىن سوتقا تالاپ-ارىز بەرەتىنىن ايتتى.
كوك بازارعا بارعان كەزدە ەرلان يسابەكوۆ تۇرعىنداردىڭ بازار اينالاسىنداعى تازالىققا بايلانىستى ءجيى شاعىم ايتاتىنىن اتادى. سونىمەن قاتار تاڭعى ۋاقىتتا (ساعات 6.00-دەن 8.00-گە دەيىن) ۇيىمداسپاعان ساۋدانى زاڭ تالاپتارىنا سايكەستەندىرىپ، سودان كەيىن قولايلى جاعداي جاساۋدى ۇسىندى. بۇل ساۋدانىڭ كوپ جىلدان بەرى جالعاسىپ كەلە جاتقانىن ءارى تۇرعىندارعا جەرگىلىكتى اۋىلشارۋاشىلىعى ونىمدەرىن قولجەتىمدى باعامەن الۋعا مۇمكىندىك بەرەتىنىن ەسكەرۋ قاجەتتىگىن ايتتى.
قالانىڭ ورتالىق ساياباعىندا اپپارات باسشىسى قوعامدىق كەڭىستىكتىڭ جاعدايىمەن تانىسىپ، كۇتىم ساپاسىمەن تانىستى. ەرلان يسابەكوۆ ساياباق اۋماعىنداعى اعاشتاردى سانيتارلىق ماقساتتا كەسۋ مەن جارىق جۇيەسىن جاقسارتۋدىڭ قاجەتتىگىن اتادى.
