جاز كەلدى - دەمەك، قازاق ءۇشىن توي ماۋسىمى رەسمي تۇردە اشىلدى دەگەن ءسوز. "جيعان-تەرگەنىڭ تويعا شاشىلسىن" دەيتىن قازاق حالقى قۋانىش بولسا، كەڭىنەن كوسىلۋدى ادەتكە اينالدىرعان. ءار توي – ەرەكشە ءسان-سالتانات، ءار اسابا – وزىنشە شوۋ جاسايدى، ال كەيدە ءتىپتى تويلار كۇتپەگەن وقيعالارعا تولى بولادى. Aqshamnews.kz ءتىلشىسى تويداعى كازۋستار مەن ەل ەسىندە قالعان ەرەكشە ساتتەردى جيناقتاپ، نازارلارىڭىزعا ۇسىنادى.
"تيتانيك" تويدا جالعاسىن تاپتى
تۇركىستاندا بولعان مەرەيتويدىڭ ۆيدەوسى كوپتىڭ تالقىسىنا ءتۇستى. ۆيدەو اۆتورى قايىقتاعى اتا مەن اپانىڭ 63 جاس مەرەيتويىن اتاپ ءوتىپ جاتقانىن جازدى. بەينەدەن زەينەتكەر اتا-اپا اعاش قايىقپەن مەيرامحانا زالىنا كىرىپ كەلە جاتقانىن بايقاۋعا بولادى. ال كورگەن جۇرتقا قايىق "ءجۇزىپ بارا جاتقانداي" اسەر قالدىرادى.
كوپشىلىك بۇل ۆيدەوعا "قازاقتار قۋايىن دەدى"، "دي كاپريو جولدا قالسىن"، "نە دەگەن فانتازيا"، "تيتانيكتىڭ جالعاسىن ءتۇسىرىپ جاتىر ما؟" دەپ پىكىر قالدىرعان.
ساكەن مايعازييەۆتىڭ كەلىنى "ەرەكشە" ۇزاتىلدى
سوڭعى ۋاقىتتا ەل اۋزىندا جۇرگەن وقيعالاردىڭ ءبىرى ءانشى ساكەن مايعازييەۆتىڭ ۇلىنىڭ ۇيلەنۋى. اسىرەسە اقتاۋلىق كەلىنىنىڭ كىلەمگە وتىرىپ، مەيرامحانادان اياعى جەرگە تيمەستەن ۇزاتىلىپ شىققانى بەينەلەنگەن ۆيدەو ەلدىڭ سوزىنە قالدى. جۇرت بۇل داستۇرگە تاڭعالا قاراپ، "الاددين ۇقساپ ۇشىرايىن دەدى مە؟"، "كىلەمگە وتىرعىزعانى نەسى؟"، "مۇنداي دا بولا ما؟" دەپ جارىسا پىكىر جازدى.
100-گە جۋىق ونەرپاز ونەر كورسەتكەن توي
4 ساعاتتىق توي ءۇشىن تۇتاس ءبىر انسامبل مەن وركەستردى جالدار ما ەدىڭىز؟ توي ەمەس شوۋ بولعان دۋماندى كەش بيىل شىمكەنتتە ءوتىپ، جۇرتتىڭ جاعاسىن ۇستاتتى. جاس جۇبايلار ۇيلەنۋ تويلارىنا سيمفونيالىق وركەستر، 30 قىزدان تۇراتىن بي ءانسامبلىن، ءبىر توپ ەتنو-انشىلەردى جالداعان.
جۇرت بۇل تويدى "عاسىر تويى" دەپ اتاپ، "مىنانداي توي ەلىمىزدە بولماعان شىعار؟"، "نە دەگەن ىسىراپ"، "وسىنداي داراقىلىق نەگە كەرەك؟" دەگەن پىكىرلەر جاۋدىردى.
20 ميلليوندىق تورت جانە نۇرلان سابۋروۆ جۇرگىزگەن كەش
بلوگەر DARICORN-نىڭ تويى دا بىلتىر ءبىراز جەردى شۋلاتقان ەدى. اق ءتۇستى درەسس-كود، 20 ميلليون تەڭگەلىك تورت، تانىمال جۇلدىزداردىڭ قاتىسۋى مەن رەسەيدەن ارنايى كەلگەن نۇرلان سابۋروۆتىڭ كەشتى جۇرگىزۋى ەلدى ەلەڭ ەتكىزدى.
ءبىرى "ءوز اقشاسى – ءوز ەركى" دەسە، ەندى ءبىرى "مۇنداي داراقىلىقپەن ماقتانۋ ورىنسىز" دەپ سىنادى.
اقتاۋدا بالاباقشا بۇلدىرشىندەرىنىڭ ءبىتىرۋ كەشى تويعا اينالدى
اقتاۋداعى بالاباقشالاردىڭ بىرىندە بۇلدىرشىندەردىڭ قوشتاسۋ كەشى حان سارايىنداي مەيرامحانادا دۇركىرەپ ءوتتى. اتا-انالار ليمۋزين، وركەستر، اسابا جالداپ، كەشتى كادىمگى ۇيلەنۋ تويىنداي استا-توك فورماتتا ۇيىمداستىرعان.
ءبىتىرۋ كەشىنەن جەلىگە تاراعان ۆيدەولار جۇرتتىڭ سىنىنا قالدى. ءبىرى: "بالا ءۇشىن ءبارىن جاساۋعا بولادى" دەسە، ەندى ءبىرى: "بەس جاسار بالاعا ليمۋزين مەن وركەستر ارتىق ەمەس پە؟" دەگەن پىكىرلەر قالدىردى.